Accessibility links

якшәмбе, 4 декабрь 2016, Казан вакыты 05:03

26 iyün – narkotiklarğa qarşı köräş köne


Narkomaniä belän menä inde 100 yıldan artıq köräşälär. Läkin äle haman da xäl yaxşıru yağına barmıy. Bügen dönyada 250 million keşe narkotik qullana. Sişämbe Tatarstan ministrlar kabinetında uzğan utırışta, narkotiklarğa qarşı köräşüçelär yänä ber bu afät turında iskä töşerdelär. 27 iyün Rusiädä yäşlär köne, şul uñayda monda bigräk tä, yäşlär häm narkotiklar mä’säläse qaraldı. Narkotiklar qulanuçılanıñ kübese 14 - 17 yäşlek yäşüsmerlär. Läkin Respublika narkologiä dispanserı baş tabibı Fättaxov Färit äfände äytüençä soñğı yıllarda kübräk olıraq yäştäge keşelär narkotiklarğa tartıla başlağan.

Soñğı yıllarda 14 – 20 yäşlek iärneñ narkotik qullanuları äzäyde, 20-30 yäşleklärneñ qullanu däräcäläre şulay uq qaldı, läkin şunsı borçıy, 30 – 40 yäşleklärneñ narkotik qullanu oçraqları arttı. Sälämätlek ministrlığı tarafınnan bıyıl bu ölkägä 117 million sum bülep birelde. Här awırunı däwalar öçen yılğa yaqınça 45 meñ sum kitä. Şuña kürä yäşlärne däwalaw däräcäsenä xätle citkermäs öçen, bez härdaim profilaktik çaralar alıp barabız.

Tatarstan dispanserlarında bügenge köndä 8 meñnän artıq keşe terkälgän. Respublikada narkotiklar kiñ taralğan üzäklärdän Bögelmä, Çallı, Älmät, Qazan şähärläre sanala. Matbuğat oçraşuı barışında, bu şähärlär belän elemtä urnaştırılğan ide. Bu cıyılışta küp kenä belgeçlär tarafınnan Bögelmä nıq tänqitlänsä dä, Bögelmädä narkotiklar belän köräşüçelär üz çiratında monı inqar ittelär.

Rusiägä isä bügen, narkotik Tadcikstan, Uzbekstan, Qırğızstan, Törkmşänstan, Qazaxstan illärennän kertelä. Ämma çittän kergän narkotik belän berrättän, biredä süz şulay uq ximik yul belän citeşterelgän sintetik narkotik turında da süz bardı. Bu xaqta Federal iminlek xezmäte xezmätkäre Nazarov Oleg äfände söyli.

Ximik yuğarı uqu yortları yäş belgeçläre narkotik uylap çığaru oçraqları, bezneñ taraftan küp tapqır açıqlandı. Bügen dä bu eş belän şoğıllänüçelär yuq tügel. Alarnıñ isemnären monda äytep tormıybız. Läkin alar şulay uq cawaplılıqqa tartıla.

Bügenge köndä narkotiklar belän köräşer öçen şartlar tudırılğanmı, närsä citmi digzän sorawğa Tatarstan buyınça Narkotiklar belän köräşü idäräse citäkçese İlgiz Minnulin bolay dip cawap birde.

AUDİO

Bügen köräşer öçen barlıq şartlar da tudırılğan. Kadrlar citä, meditsina cihazları yaxşı, säyäsi yassılıqta, xoqümät tarafınnan şulay uq yärdämne toyabız. Minemçä narkomaniä taraluınıñ säbäbe şunda ki, ul äle üzeneñ axırğı noqtasına barıp citmägän. Bez monı kötep torırğa tieşbez, şunnan soñ ul üze betä başlayaçaq. Ä älegä bezneñ töp maqsat narkomaniäne cäyeldermäw.

Tatarstannıñ yäşlär eşläre, sport häm turizm ministrı urınbasarı Kondrat'yev Andrey äfände isä, narkomaniä häm yäşlär mä’säläsenä qağılıp mondıy fiker belderde.

Elek narkomaniä belän awıruçılarnıñ 80 % yäşlär ide. Xäzer bu kürsätkeç 50%qa qaldı, Älbättä bu ber yaqtan şatlıqlı xäbär. Läkin şulay da anıñ 50се dä bezneñ öçen bik küp. Bügen yäşlärne narkotiklardan yırağraq totu, alarnıñ buş waqıtların cälep itü buyınça bezneñ ministrlıq tarafınnan küp kenä eşlär başqarıla. 27 iyün bulaçaq yäşlär könendä uzdırılaçaq bäyrämnärneñ kübese dä näqmenä bu afätkä qarşı toru maqsatınnan eşlängän.

Monnan tış Kondrat'yev äfände yaqın arada, Tatarstannıñ küp kenä tönge klublarında tikşerü uzdırılaçaq dip belderde.

Şulay itep, Tatarstanda narkotiklar belän köräşüçelär, afät belän köräş könne, çirattağı utırış uzdırıp, bu problema tağın ber qat iskä töşerdelär.

Ğädel Galämetdin

XS
SM
MD
LG