Accessibility links

якшәмбе, 4 декабрь 2016, Казан вакыты 19:19

Omskida Sabantuy uzdı


66 yıl bulmıy torğannan soñ, bıyıl, nihayät, Omskida Sabantuy bäyräme bulıp uzdı. Döres, ozaq waqıtlar ölkädä Sabantuylar bulıp tormadı dip äytep bulmıy. Ölkäneñ tatarlar tuplanıp yäşägän awıl-rayonnarnıñ qayberlärendä, yıl sayın bulmasa da, milli bäyrämebez ütkärelep tordı. Uzğan ğasırnıñ 90-nçı yıllarınnan soñ Bol'şereç'ye, Ust'-İşim, Kolosovka, Tara rayonnarında uzğan Sabantuylar turında “Azatlıq” tıñlawçıları da xäbärdarlär. Milli bäyrämebez bıyıl da bu rayonnarnıñ barsında da diärlek oyıştırıldı. Sanap kitkännärdän tış, Sabantuy bäyräme aldağı şimbä könne Muromsevo rayonınıñ Tazlar awılında da ütkäreläçäk.

Omski Sabantuyına kilgändä, ul 23 iyün könne şähär üzägennän yıraq bulmağan awıl xucalığı kürgäzmäläre ütkärelä torğan parkta uzdı. Bäyrämne oyıştıru eşlären tulısınça küptän tügel barlıqqa kilgän “Tatarstan – Omsk” iqtisad häm mädäniät üseşenä yünältelgän partnerlıq oyışması häm şähär milli mädäni möxtäriäte başqardı. Matdi çığımnar tulısınça diärlek partnerlıq oyışması isäbennän buldı. Teläktäşlek häm yärdäm kürsätüçelär dä buldı: şähär xakimiätenän grantlar konkursına täqdim itelgän Sabantuy proyektına 100 meñ rubl' aqça birelde, bäyräm uzdırılası parknı çistartu, tärtipkä kiterü eşlären Cämiğ mäçete mädräsäse şäkertläre başqardı, bäyrämneñ konsert programmasın “Umırzaya” fol'klor ansamble äzerläde, Sabantuynıñ altın tacı bulğan milli köräşne Omskinıñ “Bilbaw belän köräşü” dip isemlängän fizkul'tura-sport berläşmäse oyıştırdı. Şähär xalqı da çittä qalmadı, beräwlär transport yağın qayğırttı, ikençelär bäyrämneñ tantanalı açışında qatnaşırğa arbalı at birep tordı, öçençelär qunaqlarnı qarşı alu-ozatu xästärlegen kürde, başqa yaqtan yärdäm kürsätüçelär dä küp buldı.

Bäyrämdä räsmi dairälär wäkilläre dä qatnaştı. Ölkä qanunnar çığaru cıyılışı deputatları Rawil Bikbavov häm Marat Äderbaev, şähär başlığı urınbasarı Aleksandr Golev, şähär mädäniäte departamentınıñ yäşlär häm balalar belän eşläwçe bülek başlığı Valentina Yejova qatnaşlığında bäyräm aldınnan oyıştırılğan matbuğat oçraşuında häm Sabantuynı açu serremoniäsendä çığış yasadılar. Yıraqtan kilgän qunaqlar da buldı. Tatarstannan, Novosbirskidan häm ölkäneñ awıl-rayonnarnan kilgän kollektivlar bäyrämneñ xörmätle qunaqları buldılar. Bol'şereç'ye rayonının “Naza”, Tara şähäreneñ “Nur”, Olı Uış awılınnın “Ruzalina” ansambl'läre konsert programmasında da qatnaştılar, Qazan artistları bäyräm konsertın därtländerep cibärdelär, milli kolorit belän bayıttılar. Şähärdä eşläwçe qazax, yähüd, ärmän, qazaq oyışmaları wäkilläre cıyılğan xalıqnı bäyräm belän täbriklädelär, üzläreneñ milli cırların büläk ittelär.

Şunsı da üzençälekle buldı, bäyräm başlanır aldınnan “Umırzaya” häwäskärläre milli kiemnärdä,matur itep bizälgän at arbalarına utırıp, ğarmun uynatıp, xalıqnı bäyrämgä çaqırıp, şähärneñ üzäk uramnarınnan üttelär. Soñınnan bu atlarda bäyrämgä kilgän bala-çağalarnı utırtıp yörttelär.

Sabantuyda uyınnar küp buldı häm alarda xalıq bik teläp qatnaştı. Büläklär küpläp alınğan bulsa da, barlıq qatnaşuçılarğa xätta citmi dä qaldı. “Çülmäk watu” uyınına kilgändä, uyın öçen matur balçıq çülmäklär äzerlägän idelär. Alarnı watarğa da qızğanıç ide. Ämma, uyın axırında kiterelgän 20 dän artıq çülmäkneñ berse dä isän qalmadı. Uyınnarda ciñüçelärgä kesä telefonı, muzıkal' üzäk, DVD uynatqıç, öy kinoteatrı kebek, qimmätle büläklär birelde. Köräş batırı 50 kg awırlıqtağı täkä häm zur tösle televizor belän büläklände.

Äytergä kiräk, kümäk köç belän oyıştırılğan Sabantuy kürkäm genä uzıp kitte. Qatnaşuçılar da, xalıq ta bäyrämnän qänäğät buluları turında belderdelär.

Şähär bäyrämennän tış, Tevriz häm Kolosvka rayonnarında uzğan Sabantuylarda qatnaşqan “Umırzaya” sänğatkärläre äñgämä barışında älege bäyrämnärne çağıştırıp, üä bäyälären birdelär. Ansambl'neñ cırçısı Gölnara Makareviç bäyrämdä eçertkeç eçemleklär bulmawı, xalıqnıñ ayıq baştan matur itep küñel açuı turında şatlanıp söyläde. Rimma Baratovanı şähär uramnarında oyıştırılğan cigüle atlar paratı soqlandırğan. Fağilä Çumarova Sabantuynı oyıştıru mäşäqäten üz cilkälärenä alğan eşmäkär yegetlärgä räxmätle buluı turında söyläde.

Äye, “Tatarstan – Omsk partnerlıq oyışması eşmäkärläre kebek, tatar mädäniäten üsterüdä, xalıq öçen törle çaralar oyıştıruda yärdäm qulı suzuçılar kübräk bulsa, bäyrämnär yışraq, tabınnar mulraq, tormışlar yämleräk, Sabantuylar külämleräk bulır ide.

Saniä Mirxaleeva, Omski

XS
SM
MD
LG