Accessibility links

шимбә, 10 декабрь 2016, Казан вакыты 00:13

Tatarstan mäğärif häm fän ministrı itep Nail Wäliev bilgelände


Çärşämbe könne Tatarstan Premyer-ministrı Röstäm Miñnexanov yaña Mäğärif häm fän ministrı Nail Wälievnı täqdim itte. Azat itelgäne Räis Şäyxelislamov bu urında 3 yıl ğına eşläp qaldı. Xäzer ul mäğärifne üsterü institutın citäkläyçäk. Äytergä kiräk, Şäyxelislamovqa qadär bulğan Faris Xarisovnı bolay tantanalı töstä – çäçäkläp, büläkläp ozatu bulmağan ide. Çärşämbe könne irtük oyıştırılğan çarada kitkän ministrğa Xökümät tarafınnan da, xezmätkärlär yağınnan da küp räxmätlär äytelde. Tatarstan mäğärif häm fän ministrlığı xezmätkärläre öçen yaña citäkçe bilgeläw kötelmägänräk xäl buldı. Uzğan yılğı Berdäm Däwlät İmtixanı näticäläre yünäleşendä çıqqan ığı- zığıdan soñ şaw-şular bulıp alğan ide ministrnı alalar dip, ämma ul tiz tondı kebek toyıldı. Küräseñ alay bulmağan. Çönki Räis Şäyxelislamovnı ozatu näq şul Berdäm däwlät imtixanı belän bäyle dip farazlıylar. Çönki bu waqiğa Rusiä külämendä zur yañğıraş aldı. Anıñ nigezendä 2 maxqamä eşe dä quzğatıldı. Testlarnı tikşerü üzäge wäkilläre ul waqıtta 80 meñ rişwät alğan dip äytelde, üzläre biremnärne eşläp birep.

Şulay uq “Kommersant” gazetası yazuınça, Xisap pulatı da ministrlıqnıñ gönahların açıqlağan. 2 million sum byudjet aqçası maqsatçan qullanılmağan dip beldergän. Şulay uq Tatarstan prokurorı Kafil Ämirov ta ilküläm proyekt nigezendä büläklänergä tieşle mäktäplär häm uqıtuçılarnı bilgeläw respublika komissiäsen tözü tärtipläre saqlanmıy dip premyer-ministrğa xat yazğan. Qısqası, barısı da cıyılğan.

Çärşämbe könne Tatarstan Premyer-ministrı Röstäm Miñnexanov elekke ministrnı ozatu, yaña ministrı - Nail Wälievne täqdim itü çarasında ul neçkälelärgä tuqtalmadı. Röstäm Miñnexanov:

Törle süzlär yöri. Ni öçen alay, ni öçen bolay dip. Ul härwaqıt şulay kemder yañalıqlarnı täqdim itä, ä kemder alarnı tormışqa aşıra.

Miñnexanov ministrnı ozatu yañalıqlar kertergä tırışu belän añlattı. Täräqiyät kiräk dide. Tatarstan mäğärif ölkäsendä berençelär rätendä barırğa tieşlegen assızıqladı,. Yaxşı - äzerlekle belgeçlärgä respublikada qıtlıq dide Röstäm Miñnexanov. Häm yaña ministr - Nail Wälievqa bu ölkädä eşlärgä kiräklegen basım yasadı.

Ägär zamanında ministr itep bilgeläner öçen Räis Şäyxelislamovnı Çallıdan kitersälär, 57 yäşlek Nail Wäliev Alabuğadan. Ul anda pedagogika universitetı citäkçese ide. Belgeçlege buyınça rus tele häm ädäbiätı uqıtuçısı.

Röstäm Miñnexanov äytüençä, Nail Wäliev törle isemnärgä layıq bulğan, täcribäle şäxes häm Şäyxelislamov başlağan üzgäreşlärne däwam itärgä bik tä sälätle. dide. Nail Wäliev:

Bu ministrlıq mädäniät ministrlığı belän berrättän keşelärne tärbiäläwçe ministrlıq bulıp tora. Cämğiätneñ kiläçägen bilgelibez. Yuğarı uqu yortları, fännär akademiäse belän bergä eşlibez. Xäzer yaña mäğlümati texnologiälär kerä. Respublika berençelärdä bulırğa tieş.

Ul mäğärif häm fän ministrlığınıñ bügen eşe anı qänäğät'länderüen äytte.

Tatarstan Mäğärifne üsterü institutın citäkliäçäk Räis Şäyxelislamov xezmätkärlärenä räxmät belderde. Kiräk bulğanda könenä 12 säğät eşli idek dide ul. Barısınnan da ayırmalı bularaq Räis Şäyxelislamov tatarça söyläwdän başladı.

Monnan 3 yıl elek Räis Şäyxelislamovnı ministr itep täqdim itkändä, ul bu urınğa kilergä telämägänen beldergän ide, küräseñ ozaq eşlämiäçägen küñele sizgänder. İmeş-mimeşlärgä qarağanda, Nail Wäliev ta bu wazıyfağa üz teläge belän kilmägän di.

Landış Xarrasova

XS
SM
MD
LG