Accessibility links

шимбә, 3 декабрь 2016, Казан вакыты 07:42

Tatarstan belän Rusiä arasındağı şartnamä Däwlät Dumasında iyül başında qaralaçaq


Aldan berniçä köndälek yañalıq belän tanışıp kitik, x.t. Qazanda 28 iyün könne çirattağı zur çara üz eşen başlap cibärde. Bu yulı monda Rusiä töbäkläreneñ baş arxitektorları üzläreneñ XXIII Şurasına cıyıldı. Çara Qazannıñ ratuşasında uza. Rusiä ölkälärennän cıyılğan arxitektorlar Toraq ilküläm proyektı, anı tormışqa aşırğanda şähärlärneñ qiäfäte üzgärüe, şuşı tarmaqtağı qanunnar xaqında fikerläşte. Monnan tış kilgän qunaqlarğa älbättä inde Qazannı da kürsätäçäklär.

Tatarstannıñ iqtisat häm sänäğät ministrı Boris Pavlov 27 iyün könne Mäskäwdä bulıp qayttı. Ul Rusiä Däwlät Dumasında TU-334 oçqıçların täqdim itep qayttı. Respublikanıñ maqsatı - älege hawa maşinaların Tatarstanda yasawğa ireşep, monıñ öçen federal’ üzäktän finanslar alu. Bu älbättä bik kiräkle eş bulsa da, bu arada Däwlät Dumasınnan başqa ber mäs’älädä tırışlıq quyunı kötälär respublikada. İnde äytep kitkänebezçä, 27 iyün könne Vladimir Putin Rusiä parlamentına Tatarstan belän federal’ üzäk arasındağı şartnamäne täqdim itte. Wäkälätlärne büleşü turındağı kileşü 26 iyün könne, mäskäwdä Mintimer Şäymiev häm Vladimir Putin oçraşuında ike yaq tarafınnan da imzalanğan, dip farazlana. Deputatlar anı inde tikşerergä dä äzer ikän. Dumanıñ Federatsiä eşläre häm töbäk säyäsäte komitetı räise Viktor Grişin süzlärenä qarağanda, dokumentnı qaraw 4 iyüldä bulır dip planlaştırılğan. Anıñ fikerençä, üzgärtelgän şartnamä Rusiä qanunnarına tulısınça turı kilä. Xäyer, Tatarstan parlamentı aña soñğı tözätmälärne kertkänçe dä, dokument kire qağarlıq tügel ide, monda qanunı tügel, ä säyäsi säbäplär rol’ uynadı, dip belderde Viktor Grişin. Belgeçlär fikerençä, bu yulı şartnamä inde kire qağılırğa tieş tügel. Dumanıñ berençe vitse-spikerı Oleg Morozov ta, yañartılğan dokument böten yaqlar belän dä kileşterelgän, Federatsiä Şurasınıñ da aña şikäyätläre yuq, dip belderde. Xäyer, kileşü berençe märtäbä raslanır aldınnan da, ul şulay uq optimistik qaraşta torğan ide. Şuñardamı, älegä Tatarstanda federal’ üzäk belän wäkälätlärne büleşü turındağı şartnamäneñ yazmışı turında fiker belderüçe yuq. Küz tiderergä qurqabız, didelär Azatlıqqa qayber respublika Däwlät Şurası deputatları.

Gölnaz İlgizär

XS
SM
MD
LG