Accessibility links

шимбә, 3 декабрь 2016, Казан вакыты 12:51

Venezuela citäkçese yänä Rusiädä, Putin belän oçraşa


Rusiädä näq ber yıl elek kenä buluına qaramastan, Venezuela prezidentı Hugo Chavez yänä Mäskäwdä, xörmätle tıñlawçılar. Belarus häm İranğa da baru qaralğan şuşı säfären ul Rusiädän başlap cibärde. Anda ul Vladimir Putin belän oçraşıp, Rusiädän yaña qorallar alu xaqında söyläşer dip kötelä.

Hugo Chaveznı xäzer yış qına Latin Amerikasınıñ yaña Fidel Castrosı dip yörtälär. Kuba yulbaşçısı kebek ük ul da sotsializm tantanası, revolütsiä, imperializmğa qarşı köräş turında söylärgä yarata, häm cayı çıqqan sayın tönyaqtağı olı kürşese - Quşma Ştatlarğa bärelep kitüne xup kürä.

Chavez säfäreneñ Rusiädän başta Minskidä, ä annarı Tähranda däwam itüe dä Venezuela citäkçeseneñ kemnär belän duslaşuın, döresräge, kemgä qarşı duslaşuın yaxşı sürätli.

Ä Mäskäwgä Hugo Chavez kübräk alış-bireşkä yöri. Bıltır ul yüldä bulıp kitkännän Venezuela Rusiädän barlığı 3 milliard dollarğa höcüm oçqıçları, xärbi boralaqlar, Kalaşnikov mıltıqları satıp aldı. Şuña da Rusiä qoral citeşterüçeläre öçen Chavez bik teläp qarşı alınğan qunaq. Qoral kileşüläre bu yulı da bulır dip kötelä. Prezident Chavez üze härxäldä, Rusiägä zur ömetlär bağlap kilüen belderä:

"Bez ğädättägeçä ikeyaqlı xezmättäşlegebezgä häm berektäşlegebezgä tirän ışanıp, yaña Rusiägä, 21-nçe ğasır Rusiäsenä ömetlär bağlap kildek", dide Venezuela prezidentı çärşämbe kiçen Mäskäwgä kilep töşkäç.

Pänceşämbedä Hugo Chavez Mäskäwdä Simon Bolivar üzägen açqanda, üzeneñ bu yulı Rusiägä nigezdä mädäni bäyläneşlär mäs''äläsen qaraw teläge belän kilüen, qoral satıp alu turında doşmannar ğına söyläwen äytep kitte.

Anıñ şuşı säfäre Vladimir Putinneñ tağın berniçä könnän Quşma Ştatlarğa barıp, anda George Bush belän oçraşuı aldınnan yasala. Chaveznıñ bıltırğı säfäre häm bigräk tä anıñ Rusiädän şul xätle küp qoral satıp aluı Washingtonda zur borçular yatqan ide. Bu yulı inde Kreml Quşma Ştatlarnıñ bıyılğı säfärgä dä borçıluın kimteregä tırışa kebek. Misal öçen, Chavez Mäskäwdä Däwlät Duması deputatları qarşında çığış yasarğa telägän ide, ämma Rusiä yağı monıñ belän kileşmäde.

Qoral häm mädäni mäs''älälärdän tış Rusiäneñ Venezuela belän söyläşülärendä tağın ber möhim urtaq mänfäğäte bar, ul da bulsa, energetika häm yağulıq ölkäsendä. Neft yatmalarına bay şuşı ike il bügenge köndä Venezueladağı neft industriäsen täräqqi itü proyektların tikşerä. Moñardan tış, Latin Amerikasına torbaütkärgeçlär qoru ixtimalı qarala. Mäğlüm ki, Chavez Venezuelada distä yıllar buyı eşläp kilgän Könbatış şirkätlären qısrıqlap çığaru säyäsäten alıp bara, xätta xosusi milekne kire däwlätkä qaytaru basımın yasıy.

Comğa könne Hugo Chavez, Vladimir Putin ozatuında Rostov-Don şähärenä barıp anda at çabışları qarayaçaq häm şunnan soñ Belaruskä, annarı İranğa yul totaçaq.

Kärim Kamal
XS
SM
MD
LG