Accessibility links

якшәмбе, 11 декабрь 2016, Казан вакыты 11:07

Teatrlarğa bergäläp yoğıntı yasarğa bula


Jurnalistlar häm teatr tänqitçeläre belän berençe tapqır şulay açıqtan- açıq söyläşü küp närsälärgä etärgeç yasadı. Teatrlar tormışında üzgäreşlär bulsın öçen tänqitçelär dä, xäbärçelär dä yoğıntı yasarğa tieş. Ministrlıq ta monı qüätli. Zölfirä Salixova äytüençä, iyül ayında uq inde Qazan urıs yäş tamaşaçılar teatrınıñ premyerasın, moña qädär bulmağan xäl, jurnalistlar, tänqitçelär, belgeçlär bergä utırıp qarağannan soñ açıqtan- açıq söyläşü bulaçaq. Bu oçraşuda säxnägä quyılğan äsär turında ğına tügel, ä teatrnıñ bügenge xälen dä urtağa açıp salırğa mömkin bit.

Ministrlıq wäkile äytüençä, soñğı waqıtta säxnägä quyılğan äsärlär turında Respublika mäğlümlät çığanaqlarında tänqitçelärneñ mäqäläläre bötenläy kürenmi başladı. Bu xäl bigräk tä tatar teatrlarına qarıy. Uñışlar häm problemalarnı yıllar buyına cıyıp kilep, anı ber oçraşuda ğına sibep cibärep kenä xäl itep bulmıy.

Beläsez bit inde, tamaşaçı ayağı belän tawış birä, dip äytälär. Qaysı teatrğa keşe kübebräk yöri, şul teatr uñışlı eşli, dip äytergä bula. Misal öçen, iyün, iyül cäy aylarında opera- balet teatrında här könne anşlag. Ber genä bilet ta yuq. Tatarstan mädäniät ministrlığınıñ sänğätne üsterü bülege başlığı äytüençä, teatrlar tormışındağı uzğan sezonnıñ iñ zur uñışı näq şuşı teatrda “Şağir mäxäbbäte” operasınıñ quyıluı bulğan. Ul zamana taläplärenä dä turı kilä. Yaña texnologiälär qullanu da äsärneñ abruyın arttıra ğına. Teatrlar tormışında, ministrlıq wäkile äytüençä, kemneñ alda, kemneñ artta ikänen açıqlaw, yäğni reytingnı bilgeläw yulları da xäl itelmägän. İñ küp tamaşaçı cıyğan spektakl', bu ayda, yäki bu sezonda iñ yaxşı uynağan artist häm başqa yullar belän dä monı açıqlarğa mömkin. Teatrlarğa üz qazannarınnan çığarğa waqıt citkän.

28 iyün könne bulğan oçraşu waqıtında teatr belgeçläre artistlarnıñ torır urınnarı bulmaw turında äytep uzğan ide. Xätta teatrda yoqlap yörüçe artist ta telgä alındı. Zölfirä Salixova bu xaqta da üz fikeren belderde. Anıñ äytüençä, tänqitçelär ber yaqlı ğına fiker yörtä häm wäzğıyätne bik ük añlap ta betermi. Ämma soñğı yıllarda sänğät keşelären fatirlı itü öçen ministrlıq qulınnan kilgänneñ barsın da eşli. Urınnardağı xakimiät başlıqlarına ipotekada berençe çiratta artistlarnıñ teläge qaralsın ide digän xatlar cibärä, törle şirkät başlıqlarınnan yärdämnär sorıy.

Zamana taläplärenä turı kilgän dramaturgiäneñ bulmawı mäs’äläsendä, bu soraw da oçraşuda kütärelgän ide, Zölfirä Salixova andıy problema yuq digän fikerdä. Ämma şul uq waqıtta ul tatar teatrları tarafınnan dönya teatrları tormışına, qaya taba häm niçek baruına iğtibar citep betmi, dide.

Nail Alan

XS
SM
MD
LG