Accessibility links

чәршәмбе, 7 декабрь 2016, Казан вакыты 21:22

İstanbulda Qara Diñgez iqtisad xezmättäşlege


Bu atnada Törkiädä bulıp uzğan iñ möhim waqiğalarnıñ berse ul da bulsa Qaradiñgez iqtisadi xezmättäşlek oyışmasınıñ 15 yıllığı mönäsäbäte belän İstanbulda ütkärelgän Yuğarı däräcäle cıyılışı.

Törkiäneñ üz östenä alğan çirattağı räislegenä turı kilgän häm "Yaña ofıqlarğa cilkän kiyerü” teması astında 25 iyündä İstanbulda oyıştırılğan oçraşuda oyışmanıñ 12 töp äğzası häm 13 küzätüçe äğzase wäkillek itelde. Yuğarı däräcäle cıyılışta törle regional häm xalıqara oyışma wäkilläre belän Qaradiñgez iqtisadi xezmättäşlek oyışmasınıñ tarmaq urtaqları da qatnaştı.

Äğzalär arasındağı iqtisad xezmättäşlegen arttıru eşçänlegen başqaruçı Qaradiñgez iqtisadi xezmättäşlek oyışmasınıñ qoruçılarınnan berse bulğan Törkiä tabiği gaz häm neftka bay Xäzär (Kaspiy) belän Könbatış bazarları arasında energetika yulı bula alunı maqsat itä.

Törkiä bu maqsattan çığıp ütkärgeç proyektların başlatıp cibärde. Baku-Ceyhan neft ütkärgeçe uzğan yıl açıldı. Qazaqstan häm Rusiä neften Qaradiñgez yar buyınnan Ceyhanğa qudıraçaq ütkärgeç salınıluı däwam itelä. 2007 yılnıñ aprel ayında tözelä başlanğan proyektnıñ 2009-da ğamälgä kertelüe kötelä.

Fäqät Törkiäneñ energetika proyektları bertörkem finans awırlıqlar häm Awrupağa energiya tä’min itelüendä möhim rol uynawçı Rusiäneñ köndäşlege belän oçraştı. Çönki Rusiyä Qaradiñgez häm Xäzär diñgezendäge energiya çığanaqların Bolgaria, Serbia, Makedonia häm Macarstan-Vengria aşa Awrupa Berlegenä citkerüne maqsat itä.

Şuña kürä dä İstanbuldağı yuğarı däräcäle oçraşuda Törkiä ayruça Rusiä belän energetika xezmättäşlege mömkinlegen ezlägän bulsa, şul uq waqıtta Qaradiñgez buyında urnaşqan illär belän diñgez häm ciröste säwdäsen arttırunıñ yulların da bäxäsläşte.

Törek premyer-ministrı Erdoğan belän Rusiä ilbaşı Putinnıñ qara-qarşı söyläşülärendä tabiği gaz häm neft iñ möhim mäs’älä bulıp tordı. Fäqät, törek matbuğatında çıqqan añlatmalarğa qarağanda, bu ölkädä Törkiä faydasına älläni alğarış-täräqqiyät buldırıla alınmadı.

Qaradiñgez iqtisadi xezmättäşlek oyışmasınıñ 15 yıllığı yuğarı däräcäle oçraşuında Törkiä, Rusiä, Görcestan-Gruzia, Serbia, Bolgaria, Moldova häm Ukraina däwlät başlıqları qatnaştı.

XS
SM
MD
LG