Accessibility links

җомга, 2 декабрь 2016, Казан вакыты 21:02

AQŞ xärbiläre Ğiraqta 26 suğışçınıñ üterelüen belderä


Ğiraqtağı AQŞ xärbiläre bügen irtän Bağdadnıñ şığıylar yäşägän Sadr Şähäre öleşendä Iran terror çeltärenä bäyle dip isäplänelgän 26 suğışçını üterüe turında belderde. Xärbilär şulay uq bügenge 2 reyd barışında 17 suğışçını totqarlawları turında da xäbär itä.

Xärbilär belderüendä bu reydlar Irannan Ğiraq suğışçılarına yäşeren räweştä qoral taşu öçen cawaplı dip şiklänelgän yäşeren çeltärneñ 4 maşinasına qarşı oyıştırıldı dielä.

Quşma Ştatlar qorbannarnıñ barısı da reyd waqıtında AQŞ xärbilärenä granataatqıçlar belän höcüm itkän terrorçılar dip belderä. AQŞ yağınnan yuğaltular bulmağan.

Xäbär agentlıqları isä Iran räsmiläreneñ häm höcüm urınında yäşäwçe şahitlärneñ qorbannar arasında üz öylärendä üterelgän tınıç xalıq ta bar digän süzlären kiterä. Alar äytüençä, andıy ülüçelär sanı 8. Qayberäwläre xätta 20 di.

Sadr şähärendä yäşäwçe, höcüm näticäsendä yortı cimerelgän ber şahit Reuters xäbär agentlığına "Minem ullarım yuq. Min xatın-qızlar belän yäşim, ike qızım belän. Alarnıñ nigä minem yortıma höcüm itkänen belmim" dide.

Bağdadnıñ şığıylar yäşägän Sadr Şähäre öleşe suğışçan şığıy din ähele Moqtada äs-Sadrğa tuğrılıqlı Mähdi ğäskäreneñ oyası da sanala. Ul suğışçılar Bağdadtağı mäzhäbara üterülär öçen ğäyeplänä.

Şığıylarnıñ izge şähäre sanalğan Näcäftä äs-Sadr süzçese bu höcümnärne xökem itte. Ul höcüm barı Mähdi ğäskärenä qarşı ğına buldı digän süzlär nigezsez häm döres tügel dide.

Bügenge höcümnär Ğiraqnıñ ul öleşendä AQŞ xärbiläre kürşe Irannan qorallar häm yardäm aluda ğäyeplägän suğışçılarğa qarşı alıp barılğan operatsiälärneñ däwamı buldı. AQŞ xärbiläre suğışçılarğa şaqtıy kamil häm quätle şartlatqıçlar da kilä di.

May axırında Ğiraqtağı AQŞ ilçese belän Iran ilçese oçraşıp ildä iminlekne arttıtu yulları turında söyläşkän ide. AQŞ xärbiläre äytüençä, 4 säğät däwam itkän ul söyläşülärgä qaramastan Iran Ğiraqtğa köç qullanuğa öleş kertüen tuqtatmıy.

Tähran isä bu ğäyepläwlärne kire qağıp Ğiraqta totrıqlılıq teläwe turında täqrarlıy.
XS
SM
MD
LG