Accessibility links

якшәмбе, 4 декабрь 2016, Казан вакыты 21:42

Britaniädä haman da terror qurqınıçı qala birä, xakimiät şikle 7 keşene qulğa aldı


Britan xakimiäte, atna azağında Glasgow hawa alanı binasına benzin tutırğan maşina belän bärep kerü, Londonda isä bomba quyılğan ike maşinanı şartlatırğa tırışu oçraqların tikşerep, şul ğämällärne oyıştıruda şiklänelgän zatlarnı ezläwen däwam itä. Terrorğa qarşı köräşü turındağı qanun nigezendä älegä 7 şikle keşe qulğa alındı. İlneñ üzendä terror xäwefe yuğarı bulıp qala.

Britaniäneñ yaña premyer-ministrı Gordon Brown üz eşen menä şundıy kötelmägän häm şaqtıy xäwefle sınaw belän başlap cibärde - bar il buylap terror qurqınıçı yuğarı bulıp qala birä. Ämma yaña premyer bu sınawnı ütäçägenä, Britaniäneñ terror yanawları aldında baş imiäçägenä işarä itä:

"Britaniä häm britan xalqınnan kilgän cawap şul - bez berdäm bulıp qalıp, yanawlarğa bireşmiäçäkbez häm berkemgä dä britan yäşäw räweşen tübänsetügä yul quymayaçaqbız", dip belderde yäkşämbedä britan premyer-ministrı Brown.

Atna azağında bulğan häm xäzer inde terror ğämäle dip bäyälängän öç höcüm dä asılda uñmasa da, eçke eşlär ministrı Jacqui Smith, Britaniä citdi wä däwamlı yanaw kiçerde dip, cämäğätçelekne uyaw bulırğa öndäde. Mäğlüm ki, şimbä könne benzin kanistrları salınğan Jeep Cherokee maşinası Glasgow hawa alanı kapkasın bärep kerep, anda yanğın çıqqan ide. Kanistrlardağı benzin alayda şartlamadı, häm yanğın keşelärneñ ülemenä kitermäde.

Aña qädär ber kön aldan başqala Londonda, xalıq küp yöri torğan uramda, ber tönge klub yanında ğına şulay uq yağulıq tutırılğan ike maşina tabılğan ide. Alarnıñ da şartlatu öçen äzerlänüe xäzer şik uyatmıy, çönki alarda inälär dä tabılğan bulğan. Yäğni maqsat itep tirä-yündäge mömkin qädär kübräk xalıqqa zian kiterü küz aldında totılğan.

Düşämbegä qulğa alınğan keşelär çığışları belän nigezdä Yaqın Könçığıştan, şularnıñ ikese tabib dip xäbär itelä. Politsiäneñ tağın ber keşene ezläwe dä mäğlüm. Premyer Gordon Brown, Britaniädä äzerlängän şuşı höcümnär artında mäğlüm äl-Qaidä tora, dip beldersä dä, belgeçlär älegä, bu bäyläneşneñ ni däräcädä köçle buluı bilgele tügel, di. Londonda eşläwçe iminlek belgeçe David Claridge:

"Premyer-ministr äytkännär, äl-Qaidägä bäyläneşlär ezläwneñ ğädäti buluın kürsätä bu oçraqta. Ayırım ber mizgelgä belgänebezne taswirlaw öçen bu bälkem dä iñ äybät yuldır. Çınlıqta isä bu äl-Qaidäneñ ğomumi maqsatları nigezendä eş itüçe ber törkem genä bula ala. Ämma bez älegä şuşı farazlarıbız qayda buluıbıznı belmibez", di iminlek belgeçe David Claridge.

Britaniädäge terror qurqınıçı säbäple iminlek çaraları Atlantikneñ ikençe yağında - Quşma Ştatlarda da köçäytelde.
XS
SM
MD
LG