Accessibility links

Кайнар хәбәр

Sammit qoyaşqa bay bulsa da, näticägä say buldı


Rusiä mäğlümät çaraları häm jurnalistlär barsıda diyärlek, ber awızdañ Maine yarında, Amerika Prezidentı belän Rusiä prezidentı arasındağı ğayri-räsmi saqmmitqa uñay bäyä birde. Soñğı aylarda anti-Amerikan fikerlären arttırğan Rusiä TVläre, bu yulı ikäwläşep mäzäklär söyläp balıqqa barğan ike citäkçe Putin belän Bushnıñ samimi duslıqlarıñ kürsätte. Xättä Rusiä gazita jurnalistläre dä Kosova häm Raketa Qalqanı sistemı kebek qarşılıq tudırğan mäsälärne çitkä qağıp, iğtibarnı söyläşülärneñ niçek dustanä uzuına yünälderä.

Bügen Rusiä gazetaların baş biteñ bergenä xäbär qaplağan ide. Atlantik yarında Bushlar ğailäse yortında oçraşqan ike citäkçe George W Bush häm Putin arasındağı duslıq sürätläre.

İzvestiä gazetasınıñ berençe bitendä isä, Putinneñ, elekke Prezident ölkän George H. W. Bushnıñ baqçada uynağan eteñ sıyparğa cıyınğan çağında töşerelgän fotosı. Moskovski Komsomolets isä İke prezidentnıñ balıq awınnañ qaytqan çağında yılmayıp qul bulgağan räsimeñ bastırğan.

Gazeta redaksiäläre dä uñay qaraş tarata. Moskovski Komsomolets gazetasında yazğan Natalia Galimova, oçraşunıñ bik uñay häm küñelle uzuı turında söyle. Berençe kiçke aş tabınıñda qılıç balığına iğtibar itmiçä qalmağan. Jurnalist ike citäkçeneñ üzara qılıç qullanmamawlnarı yuramasıñ kiterä.

Novaya İzvestiä gazetası, sammitnı ğailä oçraşuına oxşata. Küñelle barğan oçraşuda, Bushnıñ Vladimir Putinnı, ğailä qunağı kebek qarşı aluı turında söyle. Xättä Condelliza Rice da çaq qına Vladimir Putinneñ muyınına salınmi qalğan.

Mäskäw Carnigie üzägee säyäsi belgeçe, Maşa Lipman, bu oçraşu, Putinneñ Münxendä bulğan Xalıqara İminlek Konferansiädä äytkän süzläre waqıtınnañ bik ayırıla, dip yuriy. Putin bu yıl başında bulğan konferansiädä, Amerikanı, däwlät çiklärenä kerü häm dönyanı tirän kiyerenkelekkä itärüdä ğayeplägän ide

“Matbuğat çaralarına äñgämä bergän çaqta alar şayartıp, külkele uzdı. Häm ul barı tik üzenneñ genä balıq tota alğanıñ äytte, häm ul bez bu balıqnı bergä tottıq dip östäde. Bu süzläre belän ul, üzeneñ yaxşı niätlelegen kürsätergä äzer bulğanıñ sezderergä tırıştı.”

Lipman süzlärençä Putin, AQŞ kütärgän qarşılıqlı mäsälälär xaqında söyläşülärgä açıq bulğanıñ kürsätte. Putin, monnañ alda Kosavanıñ bäysezlege häm Üzäk Yewropada urnaştıralaçaq raketa qalqanı kebek mäsäläregä qarşılıq beldergän ide.

“Berkemdä bu oçraşunıñ, aradağı barlıq qarşılıqlı fikerlärne çişä alaçağına ışanmi. Putin anda Raketatağa qarşı sistem xaqında ikençe ber taqdim yasadı. Läkin monıñ berençe yasağan täqdemennäñ tağın da mantıqlı bulaçağına ışanmim. Läkin şulay da, ul bu problemalarnı çişü yulında uylanunıñ ber işaräsen birde.”

Ämmä Mäskäwdäge Heritage oyışması başlığı Yevgeni Volk bu turıda saq bulırğa çaqıra.

“Minem uylawımça Putin äfändi bu yulıda üze ut şartlatu dip atağan ısulın qullandı. Yäğni ul, cämäğatçelek iğtibarın ceñelgenä cälep itä torğan, ämmä Quşma Ştatlar tarafınnañ bik qabul itelep betmägän yasalma ber başlanğıç belän çığarğa tırışıp qaradı.”

Volk, Sammitnı berençe xäbär itep tapşırğan Rus kanallarınıñ bügen başqa xäbärlärgä köçüe turında belderä. Xäzer iñ möhim xäbär, Xalıqara Olimpia Şurasınıñ 2014çı yıldağı qışqı olimpia uyınnarnıñ qaysı şähärgä biräçäge mäsäläse

Rusiälelär Qara Diñgezdäge yal şähäre Soçineñ saylanuın teli.
XS
SM
MD
LG