Accessibility links

якшәмбе, 4 декабрь 2016, Казан вакыты 15:21

Putin Bushqa yaña täqdim belän çıqtı


Rusiä prezidentı Vladimir Putin belän AQŞ prezidentı George Bush Mayne ştatında Bushnıñ xosusıy yortında 24 säğät däwam itkän ğäyre räsmi oçraşunı yılmayğan yözlär belän tämamladı. Putin Bushqa Rusiäneñ könyağındağı raketadan saqlanu qorılmaların qullanu häm bu mäsälägä qarağan söyläşülärne NATO-Rusiä şurasın da kertep kiñäytü turında yaña täqdim yasadı.

Bush belän Putin ğäyre räsmi oçraşunıñ irtänge balıq totu öleşendä bergäläp 76 santimetr ozınlıqta alabuğa eläkterüläre turında maqtandı. Ämma alar anı barıber kire suğa cibärgän.

Alar öçen iñ zur balıq ber-berenä häm dönyağa fiker ayırmalıqların çitkä quyıp urtaq nigez tabarğa äzer buluların kürsätü mömkinlege buldı diärgä mömkin.

AQŞ prezidentı George Bush jurnalistlarğa "Ikeyaqlı mönäsäbätlär däwamında bezneñ üzara kileşkän çaqlar da, kileşä almağan çaqlar da buldı. Min Vladimir Putinnıñ ezlekle, açıq, namuslı häm bezneñ mömkinleklär, bezneñ problemalar turında söyläşüe ciñel keşe buluın añladım" dide Bush.

Düşämbe könne ğäyre räsmi matbuğat oçraşuında ike citäkçe üzlären bik ciñel häm kütärenke ruxta xis itä kebek kürende. Äyterseñ lä soñğı berniçä ayda Bush Rusiäne demokratik reformalardan çigenüdä ğäyeplämägän dä, Putin AQŞ beryaqlı säyäsät alıp bara dip tänqitlämägän.

Bu oçraşudan soñ isä alar Irannıñ atom programması kebek küptännän üzara qarşılıqlarğa säbäp bulıp kilgän mäsälälär turında da ciñelräk añlaşa kebek ide.

Bush Rusiä şulay uq Tärhannıñ atom qoralı yasarğa teläwe turında borçıla dide.

Ike citäkçe AQŞnıñ Üzäk Yewropada raketa qalqanı urnaştıru niäte turında da söyläşkän. Yün ayında Sigezlek oçraşuında kötelmägändä AQŞqa Azärbäycandağı Rusiä radarın qullanırğa täqdim itkän Putin düşämbe könne tağın ber adım alğaraq kitep yaña täqdim yasadı.

"Kiräk bulsa bez bu eşkä Azärbäycanda arendağa alınğan stansiäne genä tügel, kiräk bulsa bez anı tözekländerä alabız. Ul citmi ikän bez xätta Rusiäneñ könyağında tözelüçe raketa oçırular turında kisätäçäk yaña stansiäne urtaq sistemağa totaştırırğa da äzerbez" dide Putin.

Putin şulay uq AQŞnıñ raketa qalqanı niätlären tağın da kiñäytep bu eşkä Yewropa illären dä kertep NATO-Rusiä şurası nigezendä söyläşülär başlarğa täqdim itte.

Bush isä haman da AQŞ raketa qalqanınıñ qayber öleşläre Çexiä belän Polşada bulırğa tieş digän fikeren täqrarladı.

Şul uq waqıtta ul Putinnı şundıy täqdim belän çıqqan öçen maqtap bu mäsälädä Rusiä belän dä NATO-Rusiä şurasa aşa Yewropa illäre belän dä xezmättäşlek itü kiräklege belän nıq kileşüen äytte.
XS
SM
MD
LG