Accessibility links

шимбә, 10 декабрь 2016, Казан вакыты 17:44

Dürt ayğa yaqın totıq bulgan britan jurnalistı azat itelde


Çärşämbe irtän Ğäzzä sızığında dürt ayğa yaqın urlap totılğan britan jurnalistı Alan Johnston azat itelde. Fälästin cirläreneñ şul öleşendä eşlägän Johnston anda Könbatışnıñ berdänber xäbärçese ide, ul Britaniäneñ BBC şirkäte öçen mäğlümät birep tordı. Anı inde isän kürü ömtennän waz kiçep kilgän tuğannarı öçen bu zur şatlıq buldı.

Alan Johnston çärşämbe irtän Ğäzzädä Xämas idaräse wäkillärenä tapşırıldı. Beraz soñraq anıñ şul xäräkät citäkçelärennän berse İsmäğil Xäniä belän bergä bulğan sürätläre televideniä aşa da kürsätelde. Şunda Johnston üzen azat itügä yardäm itkän härkemgä zur räxmätlären belderep, ğömereneñ urlanıp yäşägän soñğı çorın "qotoçmalı" dip atadı:

"Soñğı 16 atna minem tormıştağı iñ yaman waqıt buldı, älbättä. Bu çınnan da tere kileş kümelügä, dönyadan alıp taşlawğa tiñ ide, qaywaqıt qotoçmalı çaqlar da buldı. Min qurqınıç häm ğämällären aldan farazlap bulmağan, haman yanap torğan keşelär qulında idem", dip sürätläde üzeneñ totqındağı xälen BBC jurnalistı.

Johnston Ğäzzä sızığında martnıñ 12-sendä yuğalğan ide, näq şul könne ul yöri torğan maşina buş kileş tabıldı. Anı urlawçılar soñraq üzlären İslam Ğäskäre digän bilgesez ber oyışmadan buluın xäbär itte. Alar şulay uq, ägär dä Britaniädäge bar möselman totqınnarı da azat itelmäsä, Alan Johnstonnı cäzalap üterü belän kisätte.

Uzğan atnada ğına jurnalistnı urlap totuçılar aña şähit bilbawı kiderep, videoğa töşergän häm anı İnternetqa quyğan ide. Şul yazmada Johnston, ägär dä anı köç qullanıp azat itü tırışlığı yasala qalsa, ul şartlatqıçlarğa ut terteleçäk dip äytte. Çärşämbedä inde çınnan da azat itelgännän soñ Alan Johnston 114 kön buyı üzeneñ ber märtäbä täwlek buyı boğawlar kiep utıruın, ämma nigezdä üzenä fizik höcümnär yasalmawın, ä menä inde azat itelü aldınnan ğına anı urlap totuçılarnıñ aña bärgäläp aluın xäbär itte.

İnde äytelgänçä, britan jurnalistın urlawçılar anı Ğäzzädäge Xämas idaräsenä tapşırdı. Fälästin cirläreneñ bu öleşendä xäzer barı tik şuşı xäräkät xökem itä, uzğan ayda Xämas annan töp säyäsi köndäşe Fatahnıñ qorallı köçlären bärep çığarğan ide. Şunnan soñ Xämas citäkçeläre Johnstonnı azat itü öçen barın da eşliäçägen äytte. Ä inde çärşämbedä alar şuşı şatlıqlı waqiğägä öleş kertüen xäbär itte. Xämas citäkçelärennän berse İsmäğil Xäniä:

"Bu oçraqnıñ azağına kilü öçen citdi, awır eş, ziräklek häm realizm kiräk buldı. Bolar barısı da bu eşne fälästin xalqı öçen layıqlı itep tämamlawğa yardäm itte", dide Xämas citäkçese İsmäğil Xäniä.

Xäräkätneñ ikençe ber başlığı Xälit Meşal, Johnstonnı azat itüne säyäsi maqsatlarda qullanırğa tırışıp, şuşı şatlıqlı waqiğä Fatahnıñ buldıqsızlığın kürsätte dip belderde.

Ä Alan Johnston isä ber säğät elek Yirusalimdä xäbärçelär belän oçraştı, soñraq ul üz öyenä, Britaniägä yul tota.

Kärim Kamal
XS
SM
MD
LG