Accessibility links

якшәмбе, 11 декабрь 2016, Казан вакыты 01:30

Rusiäneñ Soçidan Olimpiä şähäre yasaw tırışlıqları


Rusiä Soçinı 2014 yılğı Qışqı Olimpiä Uyınnarı urını itü öçen küp tırışlıqlar quydı. Guatemala şähärendä Xalıqara Olimpiä Komitetı olimpiä urının bilgeläw turında qarar qabul itär aldınnan anda xätta üze dä sport belän şöğellänergä yaratuçı Rusiä prezidentı Vladimir Putin da kilde.

Sovet çorinda iñ populyar yal itü urınnarınıñ berse bulğan Soçiğa prezident Putin yış kilä. Biredä Rusiä bayların häm yoldızların da yış oçratıp bula. Näticädä qayberäwlär inde Soçinı Rusiäneñ öçençe şähäre dip tä atıy başladı.

Yar buyında yaña qunaqxanälär, zatlı kibetlär yañğırdan soñ qalqıp çıqqan gömbälär sıman kütärelä.

Azatlıqnıñ Soçidağı xäbärçese Oleg Rodin "Yortlar, ofislar monda Mäskäwdäge kebek ük bulmasa da bik küp tözelä. Şähär soñğı berniçä yılda üzgärde. Xäzer bötenläy başqağa äwerelde. Tärtip tä, çistalıq ta arttı. Çın küñeldän äytäm, şähär miña oşıy" di.

Mäskäw Olimpiä uyınnarın Soçida ütkärügä ireşü öçen bik zur tırışlıq quydı. Şähärneñ ifrastrukturasın yaxşırtu häm Qışqı Uyınnar uzdırılır dip kötelgän Yaqındağı Krasnaya Polyana çañğı şuu üzägen iñ yuğarı däräcädä qoru öçen moñarçı kürelmägän külämdä, 11 milliard dollar biru turında qarar itelde.

Ämma bu planlaştırılğan qorılmalarnıñ küpçelege äle qäğäzdä genä. Soçi berqayçan da qışqı sport urını bulmadı. Häm ul äle dä cäyen diñgez buyına yal itärgä yöri torğan urın bulıp qala.

Küpçelek qışqı qorılmalarnı qäğäzdän başlap tözergä turı kiläçäk.

Rusiäneñ Olimpiä uyının üzendä ütkärü tırışlıqların yaqınnan küzätep barğan säyäsi komentator Yulia Latınina Xalıqara Olimpiä Komitetınıñ Soçiğa kilgän wäkillärenä folklorçılar, çibär qızlar, ağıp torğan araqı belän qimmätle çaralar oyıştırdılar, şunnan başqa kürsater nerse yuq ta ide di.

"Qızğanıç ki, şunnan başqa kürsäterlek berni dä yuq ide dierlek. Plannarnı ğına kürsätep bula ide. Boz sarayı planın, olimpie awılı planın. Hem iñ zur, tozatep bulmaslıq dierlek citeşsezlek transport probleması ide" di Latınina.

Olimpiä uyınnarı ütkärü niätlärngän tawlarğa barı tik ber genä, anısı da borğalanuçan yul bar. Bu yul Putinnıñ prezident maşinası öçen bik citsä dä meñärlägän sportçı, tamaşaçı, jurnalist öçen citärlek tügel.

Şulay da Latınina Soçinı Olimpiä Uyınnarı ütkärü momkin bulğan urın dip kutärüneñ añlatırlıq säbäpläre bar di.

Cirle räsmilär häm eşmälärlär tözekländerü eşläre öçen däwlät kileşülären häm zur aqçalar aluğa ömetlänä. Häm ul aqçalar inde ağıla da başlağan.

Azatlıq xäbärçese Oleg Rodin cirle xalıq qimmätle sport proyektlarına birelüçe ul aqçalarnıñ başqaça totıluın teli di.

"Küplär, älbättä, Soçida Olimpiä uyınnarın ütkärüne xuplıy. Ämma qayberäwläre şähär büdjetındağı cirle mänfäğätlär öçen qaralğan aqçalar Olimpiä Uyınnarına kitär dip borçıla" di Rodin.

Ekologiäne yaqlawçılar da Soçidä olimpiä uyınnarı ütkärü omtılışı tirä yün moxitkä zıyan kiterüçe tözeleşlärgä kiterä dip borçıla
XS
SM
MD
LG