Accessibility links

Кайнар хәбәр

Dini ğisyan başlığı totqarlansa da, İslamabadtağı Qızıl mäçet qamalğan xäldä qala


Pakstan xökümäte köçläreneñ İslamabadtağı Qızıl mäçetne qamap totuı xälitkeç çorına kerde kebek. Xärbilär andağı ğisyannı citäklägän radikal ruxanine totqarladı, ämma mäçet eçendä äle haman da yözlärçä keşe qala birä.

Pakstan ğäskäriläre häm politsiäse İslamabadtağı Lal mäscid, yäğni Qızıl mäçetne sişämbedän birle qamap tota. Radikal islam tarafdarları üzägenä äylängän şul mäçet tiräsendä yülneñ 2-sendä iminlek köçläre häm dini ğisyançılar arasında qatı bäreleşlär bulğan ide, anda kimendä 16 keşe üterelde, 150-läbe törle yaralar aldı.

Ä aña qädär aylar däwamında Qızıl mäçet ruxaniläre xakimiätkä qarşı basıp, üz şäkertlären alar xäräm dip tapqan urınnarnı tar-mar itügä häm xökümätkä qarşı çaralarğa cibärep tordı. Misal öçen, Qızıl mäçettän çıqqan radikal dinçelär faxişälär belän bäyle dip şiklänelgän politsiä xezmätkären urlawda, balalar kitapxanäsen basıp aluda, muzıka häm video kibetläre xucaların qurqıtıp toruda ğäyeplände.

Bolar barısı da Pakstannıñ dinçelär yoğıntısı zur bulğan yıraq poçmaqlarında tügel, ä ilneñ zamança başqalasında, anıñ üzägendä, başqa däwlätlärneñ ilçelekläre urnaşqan cirdä bardı. Häm prezident Pärwäz Möşärräfneñ xökümäte älegä qädär monıñ belän berni dä eşli almadı. Ämma soñğı waqiğälär anıñ da inde sabırlığı betüen kürsätte - sişämbedä ğisyan taratuçı mäçet ğäskärilär tarafınnan qamap alınıdı häm anıñ eçendäge radikallarğa birelü taläbe quyıldı.

Şul uq könne mäçet yanında ikençe ber qızıq waqiğä buldı - ğibadätxanädän çığuçılar arasınnan xatınnar belän bergä burkağa törengän Mäwlänä Ğäbdelğäziz xäzrät totqarlandı. Qızıl mäçettägelärneñ ruxi yulbaşçısı bularaq näq menä ul sanala ide.

Xakimiät anı şunda uq terror ğämällären äzerläwdä häm keşelärne urlawda ğäyepläde. Ämma mäçettäge dini radikallar şulay itep yulbaşçısız qalsa da, alarnıñ yädräse xakimiätkä birelmiäçägen belderde. Alar belän Ğäbdelğäzizneñ ir qärdäşe dä qala birä. Atnakiç xökümät wäkile Cäwid İqbal Çema İslamabadta, Qızıl mäçettägelärneñ birelüdän başqa çarası yuq, dip kisätte:

"Andağı ike xäzrät haman da birelmiäçägen belderä, häm bez älegä alar yağınnan bögelüçänlek kürmädek. Ämma şuña da qaramastan, min şunı ğına äytä alam - alarnıñ birelüdän qala başqa çarası yuq", di Pakstan xökümäteneñ wäkile.

Xäzerge waqıtta İslamabadnıñ Qızıl mäçetendä ber meñgä yaqın şäkert qalğan dip farazlana. Şularnıñ 600-läbe xatın-qız. Çärşämbe könne mäçettän inde meñgä yaqın keşe çığıp, xakimiätkä birelgän ide. Pakstan xökümäte, waqıtında birelgännärgä qarata ğädellek kürsäteläçäk, alar eşe fäqät qanun nigezendä dä qaralaçaq, ä xatınnar häm balalarğa qarata isä bernindi dä cäza çaraları bulmayaçaq, dip belderä.

Kärim Kamal
XS
SM
MD
LG