Accessibility links

дүшәмбе, 5 декабрь 2016, Казан вакыты 13:31

2014 yılğı Qışqı Olimpiä Uyınnarı Soçida ütäçäk


Xalıqara Olimpiä Komitetı 2014-nçe yılğı Qışqı Olimpiä uyınnarın ütkärü urını itep Rusiäneñ Soçi şähären sayladı. Komitetnıñ Guatemala şähärendäge utırışında iğlan itelgän bu Rusiädä zur bäyrämgä säbäp buldı. Bu abruylı wazıyfa öçen yarışta Soçinıñ ciñüenä töp öleşne, küzätüçelär fikerençä, Rusiä prezidentı Vladimir Putinnıñ komitetqa şäxsän üze kilep çığış yasawı kertkän.

Kötelmägän säyäsi adımnar ostası Putin Xalıqara Olimpiä Komitetınıñ Guatemaladağı utırışına kilep ingliz telendä çığış yasadı. Bu anıñ berençe şundıy çığışı ide.

"Olimpiä xıyalı Rusiäneñ millionnarça watandaşın berläşterä. Qışqı sport törläre Rusiädä bik populyar. Bezneñ sportçılar küp kenä ciñülärgä ireşte häm Olimpiä xäräkätenä zur öleş kertte. Ämma älegä bezneñ Qışqı Olimpiäne bäyräm itü mömkinlegebez bulmadı. Bezneñ xalqıbız sezne iñ yaxşı urın Soçi bulaçaq dip ışandıra" dide Putin.

Küplär fikerençä Putinnıñ Guatemaladağı çığışı, şul isäptän anıñ fransuz häm ispança belän tozlap-borıçlap ingliz telendä çığış yasawı bik nıq täesir itkän.

2014-neñ Qışqı Uyınnarın üzlärendä uzdıru öçen 3 şähär köräşte. Awstriäneñ Zalsburg şähäre, Könyaq Koreanıñ Pyeoñçañ şähäre häm Soçi. Salzburg berençe tur tawış birüdä töşep qaldı. Ikeçe tur tawış birü näticälären Xalıqara Olimpiä Komitetı prezidentı Jacques Rogge iğlan itte.

"Xalıqara Olimpiä Komitetı 2014-nçe yılda 22-nçe Qışqı Olimpiä Uyınnarınıñ Soçida ütkäreläçägen iğlan itä" dide Rogge.

Rusiäneñ federal sport idaräse başlığı, üze dä 2 qışqı Olimpiadada xokey çempionı bulğan Vyaçeslav Fetisov yıllar däwamında küp kenä citäkçelär belän eşlägänlegen, ämma iñ yaxşısı Putin dip isäpläwen belderde häm Soçi Putin arqasında ciñde dide.

Britaniäneñ Guardian gazetına Olimpiä Uyınnarı turında yazuçı sport jurnalistı Duncan Mackay da monda Putin xälitkeç öleş kertkän bulırğa mömkin digän fiker belän kileşte häm anı 2012-nçe yılğı Cäyge Olimpiä uyınnarın Londonda ütkärügä ireşü öçen zur öleş kertkän Britaniäneñ elekke premyer ministrı Tony Blair belän çağıştırdı.

"Älbättä bu bik möhim faktor buldı. Dönya citäkçeläre Xalıqara Olimpiä Komitetı äğzalarına bik nıq täesir itä.Tony Blair da ike yıl elek Singapurda şunı kürsätte. Soçi oçrağı Komitetqa täesir itüneñ şul ürnägen qabatlaw buldı. Alar tawış birü aldınnan bik qatı täesir itü çaraları kürde häm xälitkeç soñğı adım bularaq şuña Putinnı da östäde" dide Mackay.

Soçinıñ ciñep çığaçağına ışanıç zur tügel ide. Şuña kürä bu näq menä prezidentnıñ qazanışı dip qarala.

Xäzerge sport qorılmaları häm başqa texnix yaqlardan qarağanda Soçi Awstriäle häm Könyaq Korealı köndäşlärennän bik nıq qalışa.

Olimpiä Uyınnarı ütäçäk Krasnaya Polyana çañğı şuu üzägendä nibarı ber genä kütärelü cihazı bar.

Ämma Rusiä citäkçeläre ägär dä Soçi saylansa Qara Diñgezgä taş atırlıq bu urında, sänğät däräcäsendä, bik zur çañğıçılar ocmaxı tözergä wäğdä itte.

Häm Mackay äytüençä, Rusiäneñ bu xıyalnı tormışqa aşıru öçen distädän artıq milliard dollar birü qararın inde xuplağan buluı da Komitetqa qın täesir itkän.
XS
SM
MD
LG