Accessibility links

Кайнар хәбәр

Dönyanıñ cılınuına qarşı köräş qısalarında şimbä könne tarixtağı iñ zur tamaşa uzaçaq


3-nçe meñyıllıqnıñ 7-nçe yılında, anıñ 7-nçe ayınıñ 7-nçe köne, yäğni aldağı şimbä şaqtıy qızıqlı ütärgä tora, xörmätle tıñlawçılar. 2007-neñ 7-nçe yülendä Portugaliä başqalası Lissabonda xäzerge zamannıñ 7 moğcizäse iğlan iteläçäk. Şul uq könne bar dönya buylap 8 şähärdä beryulı dönyanıñ cılınuına qarşı köräş qısalarında tarixtağı iñ zur tamaşa uzaçaq. Anıñ maqsatı bulıp törle illärdäge keşelärgä klimat üzgärüneñ çınnan da zur qurqınıç tudıruın añlatu, monı citdi qabul itügä künderü tora.

Live Earth, tatarça itep äytsäk Cir xaqına turıdan-turı, canlı uzaçaq tamaşa Qazan waqıtı belän irtänge 5-lär tiräsendä Australiäneñ Sydney şähärendä başlanaçaq. Şunnan soñ aña Tokyo, Şanxay, Hamburg, London, Johannesburg, Rio-de-Janeiro häm New Yorktağı säxnälär quşalaçaq. Tamaşa urınnarınıñ şulay itep törle illärdä genä tügel, törle qitğalarda da buluına qaramastan, bu ber konsert sanalaçaq häm ul 24 säğät, yäğni ber täwlek däwam itäçäk dip farazlana.

Anı satellit kanalları aşa bar dönyağa kürsätü qaralğan häm ğomumi auditoriä yaqınça 2 milliard keşegä cıyılır dip kötelä.

Oyıştıruçılar, bu tarixtağı iñ zur konsert bulaçaq dip belderä. Anıñ geografiäse genä tügel, ä qatnaşaçaq "yoldız"larına qarağanda da bu çınnan da şulay bulırğa oşap tora.

"Qatnaşu telägen beldergän inde 150-läp sänğätkär bar, Madonnadan alıp, The Police, Genesis, Linkin park, Red Hot Chili Peppers törkemnärenä qädär, Bon Jovi, Kelly Clarkson, Lenny Kravitz - aralarınnan menä şul isemnärne genä dä atap kitü citä", di Live Earth konsertın äzerläwçelärneñ berse Kevin Wall.

Tamaşanıñ bar dönyanı bergä cıyuın kürsätü öçen anıñ barışında Antarktidağa videobäyläneş yasalaçaq, annan britan tikşerenü üzägendä eşläwçelärneñ ber üzeşçän törkeme çığış yasayaçaq. Şulay itep, 7-nçe aynıñ 7-nçe könendä şuşı konsert Cirneñ 7 qitğasın berläşteräçäk.

Dönyaküläm cılınuğa qarşı köräşünı, ayırım alğanda, şunıñ qısalarında uzaçaq bu konsertnı Quşma Ştatlarnıñ elekke vitse-prezidentı Al Gore bik yaqlap yöri. Bu xaqta ul "Caysız Xaqiqät" digän dokyumental'' film da töşerep, ul film Oscar bülägenä layıq bulğan ide. Anda elekke vitse-prezident, dönyadağı cılınu öçen berençe çiratta keşelärneñ üz eşçänlege ğäyeple digän fiker ütkärä.

Ä inde şimbä uzaçaq konsertnıñ kiräklege, anıñ ähämiäte turında Al Gore bolay di:

"Afrikada şundıy äytem bar - tiz genä eş itärgä teläsäñ, sin üzeñ genä eşlä. Ä inde yıraqqaraq barırğa teläsäñ, başqalar belän bergä bar. Bez tiz genä, häm yıraqqa barırğa tieş. 7-nçe yüldäge Live Earth konsertı bar dönya buylap härkemgä dä berük närsäne - "Eş itü waqıtı kilde!" digän xäbärne citkerü öçen planeta tarixındağı ber möhim mizgel bulaçaq", di elekke amerikan vitse-prezidentı Al Gore.

Konsertnı oyıştıru da öleşçä moxitkä zian kitermi torğan ısullarğa nigezlänäçäk. Rioda, misal öçen, bar generatorlar da bioyağulıqta eşliäçäk.

Live Earth tamaşasın şimbä könne İnternetta küplär öçen tanış bulğan häm äwzem qullanılğan MSN çeltärendä dä qarap bulaçaq.

Kärim Kamal
XS
SM
MD
LG