Accessibility links

шимбә, 3 декабрь 2016, Казан вакыты 09:51

NATO citäkçese Ukraina-NATO mönäsäbätlären bik uñay bäyäli


Ukraina belän NATO 1997 yılnıñ 9 yülendä imzalanğan Ukraina-NATO Xartiäsenä 10 yıl tulunı bilgelärgä äzerlänä. NATO general sekretare Jaap de Hoop Scheffer bu uñaydan Brüsseldä jurnalistlar belän utırıp Kiev häm NATO arasındağı mönäsäbätlär turında söyläşte. Oçraşuda Azatlıq xäbärçese dä bar ide.

Qayberäwlärgä Ukraina säyäsätendäge xäzerge butalçıqlıq oşamasqa da mömkin. Ä menä NATO general sekretare minem öçen bu Ukrainanıñ sälamät demokratiä däräcäsenä kütärelüen añlata di.

Şul uq waqıtta ul Kiev belän NATO arasındağı xezmättäşlekneñ dä şulay uq üsüen assızıqladı.

"Ukrainada xäzer moñarçı kürelmägän, küpkä ölgergänräk säyäsi debatlar bara. Barlıq näticälären isäpkä alğanda, min säyäsi debatlarnı härçaq uñay bäyälim. Bu Ukrainanıñ üz debatları bulğanğa kürä, min ul säyäsi debatlarğa quşılmıym. Ämma şul uq waqıtta xezmättäşlek arttı. NATOnıñ barlıq operatsiälärendä häm çaralarında da şulay uq qatnaşuçı başqa berär partnernı äytä alasızmı? Min başqa andıynı belmim" dide de Hoop Scheffer.

De Hoop Scheffer şulay da bu maqtaw süzläre Ukraina citäkçelärenä yal itärgä dä bula digänne añlatmıy, üzgäreşlärne däwam itärgä, bigräk tä ilneñ qorallı köçlären, eçke eşlär ministrlığı ğäskärlären häm iminlek xezmätlären zamançalaştırırğa kiräk dide.

Ukraina prezidentı Viktor Yuşçenko ilneñ NATOğa quşıluın bik nıq yaqlasa da, fiker beleşülär küpçelek xalıqnıñ moña qarşı yäki bitaraf buluın kürsätä. Şul uq waqıtta küpçelek Ukrainanıñ Yewropa Berlegenä quşıluın teli.

De Hoop Scheffer Ukraina NATO äğzası bulırğa tieşme digän eçke bäxäslärgä quşılırğa telämäwen belderde.

"Min fiker beleşü näticälärenä berqayçan da bäyä birmim. Ämma min, älbättä, Ukrainada NATOğa quşıluğa qarşı çığuçılar törkeme buluın beläm. Häm çınnan da alarnıñ moña xoquqı bar. Tağın ber märtäbä äytäm, min Ukrainadağı debatlarğa quşılmıym. Äytkänemçä, NATO ker yuu sabını tügel. Min Ukrainağa NATOnı satarğa cıyınmıym. NATOnı satmıylar. NATOnıñ ni buluın añlatıp birälär" dide.

Anıñ äytüençä, Ukrainadağı qayber qarşı çığuçılar küräseñ NATOnıñ maqsatların häm burıçların añlap betermi.

"Minemçä, NATOğa qarşı çığuçılar, häm bez alar belän eşlärgä, alarğa yardäm itärgä telibez, şuña kürä Kievta bülekçäbezne dä açtıq, alar küräseñ NATOnıñ ni buluın, ni belän şöğellänüen yaxşıraq belergä tieşter" dide de Hoop Scheffer.

Rusiä daimi qabatlap kilgän, NATOnıñ könçığışqa taba kiñäyüe töbäktä totrıqlılıqqa yanarğa mömkin digän borçılularnı NATO citäkçese kire qaqtı.

"Ğömümi qağidä bularaq minem berqayçan da NATOnıñ kiçäyüe kemgä dä bulsa yanawın kürgänem yuq. Härber il NATOğa irekle räweştä üz teläge belän quşıla. NATOnıñ berqayçan da, ber ilgä dä NATOğa quşılu öçen basım yasağanı yuq. Belüegezçä, bu xalıqnıñ irekle teläge nigezendä genä bula torğan xäl" dide NATO general sekretare Jaap de Hoop Scheffer.
XS
SM
MD
LG