Accessibility links

Кайнар хәбәр

AK Partia aldında yaña säyäsi maqsatlar tora


Törkiyädä Ğadillek häm Täraqqiät partiäseneñ yañadañ xaqimiätkä qattuı tiräsendäge tantanalı käyeflär basıla bara. İs AK partiä aldında xäzer tiz arada xäl iteläse mäsälälär tora. Premyer Recep Tayyip Erdoğan 22nçe Yüldäge saylawlar aldınnañ bulğan kiyerenkkä qabat arttırmas öçen bik saq tiyeş.

Xäzer Erdoğan aldında torğan iñ berençe xäl itkeç mäsälälärdäñ berse, yaña däwlät prezidentlığına namzät saylaw.

Parlament Erdoğan täqdim itkän, Tışqı eşlär ministrı Abdullah Gülneñ namzätlegen kire qaqqan ide. Bu nizaq ildä waqıtınnañ alda saylawlarga kiterde. Dönyäwi Däwlät yaqlılar, xatını yawlıq bäylägän Abdullah Gülgä ışanıp beterme.

Ägär dä Abdullah Gül namzätlekkä yañadañ taqdim itelsä, bu körçekkä kiteräçäk. İstä totarğa kiräk, monıñ öçen AKP parlamenttağı tawışınıñ 3tän 2 öleşen alırğa tiyeş äle.

Erdoğan, Anqarada jurnalistlär aldında, Prezidentlık mäsäläsen tınıç yuldañ xäl itçäklärenä ışanuın äytep, kileşergä taba äzer buluların kürsätte. Şul uq waqıtta ul, Prezidentlıqqa namzät bulıp çığu-çıqmaw mäsäläsen Gülneñ, üze qarar qılırğa tiyeş dide.

İkençe mäsälä, Törkiyäneñ Yewropa Berlegenä äğzälegenä äzerlektä, qanun häm idarä reformaların arttıru häm şul uq waqıtta iqtisadi äyläneşne saqlap qalu mäsäläse.

Brussel, Törkiyäneñ Yewropa Berlegenä äğzälek däğwäsendä unışsız noqtalarnı yañadañ qarap çığarğa önde.Yewropa Berlege kişäyü komissionerı Olli Rehn monıñ ähämmiäten düşämbe könne yasağan çığışında bolay añlattı:

“Bez yaña xökümätneñ tiz arada formalaşuın kötäbez. Häm yaña xökümätneñ belgelängän näticäle qanuni häm iqtisadi reformalarıñ yañadañ başlatıp cibärüe bik möhim.”

The Economist Jurnalınıñ Törkiyädäge xäbärçese Amberin Zaman, AKPneñ yañadañ saylanuında iqtisadi säbäblärdäñ berse, sonğı waqıtta Törkiyädä yıllıq üseşneñ 7 protsentqa artuınıñ täsere buluın farazlawın äytä.

“AKPnıñ yañadañ xaqimiätkä kileünendä iñ zur säbäblärdäñ berse, iqtisad mäsälälärenä birelüe. Ğadi xalıq, tormışınıñ yaxşıruın kürde.. bigräktä fäqirräkläre. AKP bu keşelärgä yärdäm itär öçen küp tırıştı. Ägär dä awıl cirlärenä barsağız bu xälne bik küp keşe üzläre añlatıp birer.”

3nçe zur mäsälä, Törkiyeneñ könyağındağı Körd ğisyanı mäsäläse. Küp yıllardañ birle berençe tapqır, 27gä yaqın körd wäkil yaña mäclestä kerä aldı. Zaman bu xälne, qanun çığaruçılar öçen zur cäwaplılıq taläp itäçäk dip sani. Alarnıñ wazifası, körd mäsälälärendäge töyennne söyläşü yulı belän çişü bulaçaq.
XS
SM
MD
LG