Accessibility links

якшәмбе, 4 декабрь 2016, Казан вакыты 11:16

Aziä Futbol Berençelegendä berençe tapqır Ğiraq ciñde


Dönya buylap ğiraqlılar uzğan töndä ciñüne bäyräm itte. Döres, älegä Ğiraq futbol berençelegendä genä ciñde. Ämma şığılarnıñ da, sönnilärneñ dä bergä bäyräm itüläre - ğiraqlılarnıñ berläşä alu ixtimalına ömetlär tudırdı. Yäkşämbe kiç İndoneziä başqalası Cakartada bulğan uyında Ğiraq üzennän köçleräk Söğüd Ğaräpstannı 1-0 xisabı belän ciñde..

3 tapqır Aziä berençelegen yawlağan Söğüd Ğaräpstannı ciñgän Ğiraq futbolçıları öçen ildä şatlıq çiksez ide. Kön dä köç qullanu häm qan qoyıştan başqa äyber kürmägän keşelär uramğa çığıp qoçaqlaştı, biede, cırladı.

Ğiraqnıñ futbol taqımı – näq Ğiraq cämğiäten xäterlätä. Futbolçılar arasında –şığılar häm sönnilär, kördlär häm törkmännär bar, alarnıñ barısınıñ da maqsatı ber.

Ğiraq futbolçılarınnan 3 trener baş tartqan bulğan, Aziä Berençelegenä 2 genä ay qalğanda, Ğiraq taqımın Braziliälı Jorvan Vieira üz qulına alğan. Azat Ğiraq radiosınıñ Bağdad bülege başlığı Nabil äl-Häydäri süzlärençä, futbolçılar ireşkän uñış – Ğiraqqa da säyäsi däräcädä bik kiräkle misal bula ala:

"Ğiraqnıñ böten şähärlärendä bäyräm ittelär, häm alar böten dönyağa – üzläreneñ berdäm Ğiraqlı buluların kürsättelär."

Bu ciñüneñ barı tik futbolda ciñü genä bulmağanın küplär añladı. Watanınnan çittä, Ürdün başqalası Ammanda yäşäwçe Ali Adnan, ğiraqlılarğa berdämlek teläde:

"Awır waqıt kiçergän Ğiraq xalqın qotlıym, alğa taba ciñülär kübräk bulır dip ömetlänäm. Xoday sönnilärne häm şığılarnı berläştersen, bezneñ arada ber ayırma da yuq. Bez ber bayraq astındağı qardäşlär, qotlıym Ğiraq xalqın."

Başqala Bağdadta Karrada isemle şığı bistädä yäşäwçe sönni ğaräbe Möhämmäd Muhesin dä, kiçä ciñü genä bäyräm itelmäde, dide:

"Kiçä bez ciñüne genä tügel, ä ğiraqlılarnıñ berläşüen häm mäsxäbara ayırmalıqlarnıñ çitkä kitüen bäyräm ittek. Keşelär üzläreneñ ğiraqlı buluların toydı häm Ğiraq öçen bulğan zur uñış öçen şatlandı."

Ğiraq premyer-ministrı Nuri äl-Mäliki, ğiraqlılarnıñ "şatlığı terrorçılar näfrätennän zurraq" dip belderde.

Alay da yuğaltularsız da bulmadı. Uzğan çärşämbe könne Könyaq Korea belän yarım final uyınnarda otqaç Ğiraqta bäyräm itkändä şartlaw bulıp 50gä yaqın keşe häläk bulğan ide... Kiçä dä uramda bäyräm itkändä hawağa ut açqanda kimendä 7 keşe häläk buldı.
XS
SM
MD
LG