Accessibility links

җомга, 9 декабрь 2016, Казан вакыты 13:00

AQŞtan İzrail häm ğaräp illärenä aqçalata häm qoral belän yardäm


AQŞ däwlät sekretare Condoleeza Rice häm saqlanu ministrı Robert Gates, Mısırğa kilep ğäräp illäre häm İzrailgä xärbi yardäm wäğdä itte. Düşämbe könne, Rice, milliardlarça dollarlıq qoral Söğüd Ğaräpstanı häm Mısırğa - Äl-Qaida, Hizbolla, Süriä häm İranğa qarşı torırğa yardäm itäçäk, dip belderde. İran – mondıy yardäm töbäktä qurqu tudıraçaq, digän ide. Rice monı kire qaqtı.

Töbäktäge urta köçlärgä qoral belän yardäm itep Amerikan ministrları alarğa bulışırğa teli, säfärneñ maqsatı şul, dide kiçä Rice.

Bügen däwlät sekretare häm saqlanu ministrı Mısırğa kilde. Säfär aldınnan däwlät departamentınıñ matbuğat wäkile Tom Casey, söyläşülär - aldan planlaştırılğan kileşülär turında bulaçaq, dip belderde:

"Bügenge çaralar – bezneñ töbäktäge duslar häm berektäşlär belän eşläwneñ ber öleşe. Bu Quşma Ştatlarnıñ, urta ber tirädä torğan illär belän eşläw telägen, alarğa yardäm itü telägen, İran häm Süriä, alarnıñ daimi räweştä terrorçılarnı yaqlıwına qarşı torırğa yardäm itü telägen kürsätä."

Düşämbe könne iğlan itelgän mäğlümatlärgä qarağanda, AQŞ İzrailgä 30 milliard dollarlıq yardäm bülep biräçäk, bu – moñarçı birelgän açqadan 25%qa artıq. Şul uq waqıt eçendä Mısırğa 13 milliard bülenä. Söğüd Ğaräpstanı häm qayber başqa ğaräp illärenä qoral belän yardäm iteläçäk. Ul qoralnıñ aqçalata bäyäse iğlan itelmäde, ämma farazlarğa qarağanda, anıñ küläme 20 milliard dollarğa qadär bulırğa mömkin. AQŞ Ğiraq mäsäläsendä östämä yardäm soramıy, dide Rice. Ämma böten berektäşlär – Ğiraqta totrıqlılıq buluın teli.

İrannıñ Amerika töbäktä qurqu xise tudıra digän ğäyepläwen Condoleezza Rice kire qaqtı häm nindi dä bulsa qurqu yäki totrıqsızlıq turında süz çıqqanda – anıñ nigeze – İrandağı rejimda, dip belderde.

Şik tudırğan ikençe ber mäsälä isä – AQŞnıñ qoral belän yardäm itüe töbäktä qorallanu yarışın başlap cibärergä mömkin. Söğüd Ğaräpstanı Ğiraqtağı sönni oppozisiäne yaqlıy häm Ğiraqqa üzeneñ sönni suğışçıların cibärä digän farazlar bar. Äle genä AQŞnıñ Berläşkän Millätlärdäge wäkile Zalmay Xälilzad, Söğüd Ğaräpstanı Ğiraqqa yardäm itär öçen mömkin bulğannıñ barısın da eşlämi, digän ide.

Qoral belän häm aqçalata yardämne äle AQŞ kongressı xuplarğa tieş. İnde xäzerdän ük, Kongressta, bu qoral häm aqçalarnıñ höcüm itü tügel, ä barı tik saqlanu maqsatlarında qullanılaçağına ışanıç kiräk digän süzlär yañğrıy.

Robert Gates häm Condoleezza Rice bügen şulay uq bergä Söğüd Ğaräpstanğa kilde, irtägä alar säfärlären törle illärgä ayırım däwam itäçäklär.
XS
SM
MD
LG