Accessibility links

якшәмбе, 11 декабрь 2016, Казан вакыты 16:52

Xatın-qızlar kübräk söyläşäme ällä irlärme?


Xatınnar irlärdän kübräk söyläşä digän ğibärä – törle millätlärgä xas... Xatınnar tele belän, irlär qulı belän ala, dilär tatarlar. Qıtayda – xatınnıñ tele – qılıç, ul anı ütken totır, dilär. Daniädä – xatın-qıznıñ süze betkänçe diñgez qorır digän mäqäl bar. Soñğı fänni tikşerülär isä – mäqällärneñ döreslegen kire qağa tösle....

Sez könenä yaqınça niçä süz äytäsez, dip uylıysız? Tiz genä cawap birüe awır, ä menä AQŞ ğalimnäre, tikşerülär uzdırıp, irlär dä, xatın-qızlar da könenä yaqınça 16 meñ süz äytä, digän näticägä kilgän. Xatın-qızlar kübräk söyläşä digän fiker – fänni yaqtan döres tügel, çönki xatınnar kübräk öydä, uramda söyläşsä, eş urınnarı, uqu yortları kebek yabıq cirlärdä – söyläşüçelär kübräk irlär ikän. Arizona Universitetınıñ psixologiä ğalime Matthias Mehl süzläre qarağanda, irlärgä söyläşer öçen – eş möxite kiräk:

"Söyläşü eş turında häm yabıq ber cirdä bulsa – söyläşüçelär kübräk irlär bula."

Häm, bu älbättä, xatın-qızlarnıñ eş turında söyläşä almawın añlatmıy, dip östi ul. Tikşerü 98nçe yıldan alıp 2004nçe yılğa qadär alıp barılğan, irlär häm xatın-qızlarnı ayırıp törkemnärgä bülep alarnıñ täwlek buyına söyläşülären yazıp barğannar.

Tikşerüdä qatnaşqannarnıñ 15%tı yoqlawdan qalğan başqa waqıtta ber dä awızların yapmağannar, alarnıñ yartısı irlär – yartısı xatın-qızlar bulğan, di Arizona ğalime:

"Xatın-qızlar küp söyläşä digän äyberne bälki bez – nizaqlarnı çişü ısulınnan alğanbızdır. Mönäsäbärlär kierenke bula başlağanda ğadättä irlär söyläşmi başlıy, xatınnar kiresençä söyläşü häm açıqlawnı taläp itä. Berse taläp itä, ikençese çigenä. Nizaq çişelmi qalsa ul bezneñ öçen bik möhim bula başlıy, häm bez anı ğömümiläşterep – xatınnar küp söyläşä dip äytäbez."

Älbättä bolar barısı da farazlar ğına, här törle fänni tikşerenü kebek anıñ näticäläre tulısınça qabul itelä almıy. Alay da – xalıq arasında kiñ taralğan – irlär belän xatın-qızlar törle äyberlär turında söyläşä digän fiker çınbarlıqqa turı kilä, di professor yardämçese:

"Xatın-qızlar kübräk mönäsäbätlär, moda turında söyläşä. Elek tä şulay uylıy idek. "

İrlär sport häm texnologiälär turında söyläşergä yarata. Amerikan ğalimnäre uzdırğan tikşerüdä 29 yäşkä qadärge keşelär qatnaşqan, törle yäştä söyläşü teläge üzgärergä mömkin. Ämma monnan soñ – xatın-qızlar irlärdän kübräk söyläşä digän süzgä ışanmağız!

Azatlıqnıñ xatın-qızlar säxifäse här atnanıñ sişämbesendä efirğa çığa. Qazanda bezneñ qısqa çığarılışnı kiçke 10 tulğanda Yaña Ğasır dulqınnarında tıñlağız. Azatlıq här kön qısqa dulqınnarda häm internetta!
XS
SM
MD
LG