Accessibility links

якшәмбе, 4 декабрь 2016, Казан вакыты 23:20

The Wall Street Journalnı Rupert Murdoch satıp aldı


Eşmäkärlek dönyasın yaqtırtqan iñ zur basmalarnıñ berse – The Wall Street Journal gazetın – dönyadağı iñ bay media magnatı Rupert Murdoch satıp aldı. Ber ğasırdan artıq waqıt basmanıñ xucaları bulğan Ban-croft ğailäse - Murdoch täqdim itkän 5 milliard dollarnı kire qağa almadı. Bu närsäne añlata? Dönya biznes basmasın nindi üzgäreşlär kötä ala?

Rupert Murdoch - üz eçenä bik küp törle holding häm şirkätlär alğan News Corporation digän törkemne citäkli. Aña internet, televidenie, iärçenle televidenie kerä. Bügenge köndä dönyanıñ iñ zur media magnatınıñ Bolğarstan, Romaniä, Serbiä, Gruziä, Polşa häm Törkiä televideniä şirkätlärendä üz öleşe bar.

Qıtayda Murdoch citäklägän korporasiä – Aziädäge iñ zur Start isemle media häm küñel açu şirkäten satıp aldı. Şulay uq anıñ qulında bulğan filmnar, jurnallar, basmalar, kitap näşriätları, tawış yazdıru studiäläre häm radiolar - bolarnıñ sanı bik küp. News Corporation törkemenä – News Outdoors digän şirkät tä kerä, alar – uramda reklama taqtaların sata. Bu şirkätneñ zamança watılmıy torğan piyala quyılğan, tönlä dä yaqtırtılğan taqtaların inde Qazan tramvay häm avtobus tuqtalışlarda da kürep bula... News Outdoors dip yazılğan baş isem östendä – keçkenä genä tügäräk tamğanı kürsägez – ul şul Murdoch şirkäteneke bulıp çığa.

Bügen New Yorkta ireşelgän kileşü nigezendä, Rupert Murdoch Dow Jones näşriäten üz kontrolenä ala. The Wall Street Journal basmasın näq şul näşriät çığara. The Journal gazetın Quşma Ştatlarda häm dönyada citdi eşmäkärlek belän şöğellängän keşelär uqıp bara, häm anda yazılğan äyberlär bazarlarğa häm xakimiättäge keşelärgä täsir itü köçenä iä.

New Yorktağı mäğlümat çaraları belgeçe Porter Bibb, Murdoch üz xıylına ireşte, dip belderde:

"Ul The Wall Street Journalnı inde yıllarça teläde. Berençe tapqır 11 yıl elek, annarı 9 yıl elek ul Dow Jonesqa törle täqdimnär yasap qaradı, ämma alar kire qağıldı. Xäzer ul mäğlümat çaraları dönyasında iñ berençe keşe, ul anı gel teläde."

Ämma böten keşe dä Murdochnıñ şatlığın urtaqlaşırğa äzer tügel. Basmanı satu qararı iğlan iteler aldınnan anıñ ike möxarrire eştän kitüläre turında belderde. Jurnalistlar satılu ğamälenä qarşı häm xäzer başqa yullar ezli, basmanıñ elekke xucaları – Bancroftlar ğailäse – basmınıñ yözenä häm bäysezlegenä qurqınıç yanıy, dip belderde.

Mäğlümat çaraları dönyasında iñ tanılğan keşe bulsa da 76 yäşlek Rupert Murdoch ber qayçan da alarnıñ ışanıçın yawlıy almadı. Üz baylığın ul sensasiä, dälilläre bulmağan farazlar yazğan basmalar yardämendä tupladı.

Avstraliädä tuğan Murdoch AQŞqa kilep amerikan watandaşlığı alğaç, "New York Post" gazetın üz qulına alıp anı küpläp sattı. Küpläp satunı oyıştıru öçen ul sensasion baş isemnär, tikşerelmägän mäğlümatlär qullandı, di belgeçlär. Bügenge köndä wazğiät küpmeder üzgärgän, ämma alay da basmalarnıñ sıyfat yağı yuğarı däräcädä tügel. Xäzer Murdoch maxsus komitetı tözep, alarğa The Wall Street Journal möxarrirlären bilgeläw häm eşelärennän alu wäkäläten biräçäk, dilär.
XS
SM
MD
LG