Accessibility links

пәнҗешәмбе, 8 декабрь 2016, Казан вакыты 12:56

Sönni ministrlar Ğiraq xökümätennän kitä


Ğiraqnıñ iñ zur säyäsi berlege – Sönnilärneñ Tatulıq Frontı – xökümättän üz ministrların çığaruın belderde. Protestnıñ säbäbe – küpçelekne şığılar täşkil itkän xökümätneñ – sönni säyäsätçelär taläplärenä iğtibar itmäwe. Ğiraqnıñ säyäsi dairälärendä – wazğiät bik qatlawlı disälär, Waşingtondağı Aq Yortta – alğa taba küz kürer, dip - tınıç buluların belderälär.

6 sönni ministrnıñ Nuri äl-Mäliki citäkçelegendäge xöxümätne taşlap kitü qararı –xökümät öçen bolay da awır çorğa turı kilde.

Sönnilärneñ Tatulıq Frontı yulbaşçısı Rafaa äl-İssawi, xökümätne täkkäberlektä ğayepläde. Mäğnäse bulğan ber nindi dä reformalar ğamälgä aşırılmıy, dide äl-İssawi.

Uzğan atnada Tatulıq Frontı xökümätneñ alğa taba plannarın sorap äl-Mälikigä xat yullağan bulğan, aña cawap bulmadı, di äl-İssawi.

Xalıqara Krizis Törkeme belgeçe Joost Hiltermann, çınbarlıqta Tatulıq Frontı xökümättä, däwlät dairäläre häm iminlek köçlärendä üzeneñ wäkillären arttırırğa teli, di:

"Häm bu bik ciñel bulmayaçaq, çönki xakimiättäge firqalär, ğısyançılıq sönni ğaräplär belän bäyle, dip sanıy. Höcümnärne elekke rejimnıñ kire qaytu tırışlığı itep kürälär, häm alar moña qarşı toraçaq."

Vise-premyer, milläte belän körd Barhim Salih, bu xäl – konstitusiä qabul itelgännän birle bulmağan citdi nizaq, dide.

Ul arada Waşington tınıç bulıp qala. Aq Yortnıñ matbuğat wäkile Tony Snow, näticälär yasarğa irtä äle, dide:

"Monıñ niçek däwam itäçägen küzätik, firqalär arasında söyläşülär bara. Sönnilär firqase başlığı da söyläşülärdä qatnaşa."

Sönni Tatulıq Frontınıñ parlamenttağı 44 deputatı üz urınnarında qala, ministrlarnıñ kitüe dä äle raslanmağan, dide Snow:

"Xökümättän kitü-kitmäwlären premyer-ministr xäl itäçäk. Firqa üze parlamentta qala häm tawış birü xoquqına iä bula, dimäk bu xäl – nindider eçke säyäsi uyınnar."

Ğiraq xökümäte tiräsendäge xällär irtägä açıqlanır dip kötelä.
XS
SM
MD
LG