Accessibility links

якшәмбе, 4 декабрь 2016, Казан вакыты 15:25

Belarus prezidentı Gazpromğa $460 mln burıçnı qaytaraçağın belderde


Çärşämbedä Rusiäneñ Gazprom şirkäte, Belarusnıñ burıçları säbäple, aña gaz cibärüne comğadan başlap 45 protsentqa kimetäçägen iğlan itkän ide. Atnakiç könne Belarus prezidentı Aleksandr Lukaşenka 460 million dollarlıq burıçnı däwlät qaznasınnan tüliäçägen häm Venesueladan kredit alaçağın belderde.

Belarusnıñ Gazpromğa burıçı menä niçek cıyılğan. Şuşı yıl başınnan Gazprom Belarusqa gaz bäyäsen ike tapqır arttırıp, meñ kub metrnı 100 dollarğa citkergän ide. Alay da, 1 Yüngä qädär bäyäneñ 55 protsentın ğına tüläp torırğa röxsät itte, läkin 23 Yülgä qädär bar burıçlarnı qaplap beterergä digän taläp quydı. Minski monı eşlämäde. Çärşämbedä Gazprom wäkile Sergey Kupriyanov mondıy belderü yasadı:

"3 awgusttan başlap sägät 10-nan Belarusqa gaz cibärü täwlegenä 21 million kubik metrga, yağni 45 protsentqa kimeteläçäk. Şul uq waqıtta Belarus aşa öçençe illärgä tranzit küläme üzgärmiäçäk" dide Gazprom wäkile.

Bu tınıçlandıruğa qaramastan, Yewrokomissiä wäkile Martin Selmayr, wazğiätkä borçılu belderep, taraflarnı çişeleş tabırğa çaqırdı.

Soñğı atnalarda Mäskäw häm Minskida ütkän söyläşülär näticä birmägäç, küzätüçelär ike arada çirattağı gaz suğışı başlana, digän farazlar da yasap ölgergän ide.

Ämmä atnakiç könne Belarus prezidentı Aleksandr Lukaşenka Gazpromğa digän 460 million dollar burıç däwlät qaznasınnan tülänäçäk, digän belderü yasadı.

Älbättä, qaznabız beraz buşap qala, läkin bezñeñ Ugo Çaves kebek duslarıbız bar, alar bezgä yaxşı şartlarda kredit birergä äzer, dide ul.

Venesuela kreditnı nindi şartlarda biräder - bilgesez, ämmä şul mäğlüm, Rusiä täqdim itkän kreditnıñ şartı yılına 8,5% bulğan. Lukaşenka, bu Belarus öçen qabul itelerlek tügel, dip anı kire qaqtı.

Şuşı soñğı belderüe belän Lukaşenka, yaqın kürşeñ bulğançı, yıraq dustıñ bulsınçı, dide sıman.

Berençe qaraşqa 460 million dollar Minski öçen ällä ni zur aqça da tügel kebek. Qayber mäğlümätlärgä qarağanda anıñ valuta saqlanmaları 3 milliard dollar çaması.

Şualy itep, älegä bäxäs xäl itelde, çirattağı gaz suğışı bulmasqa oxaşağan. Läkin Mäskäw gaz bäyäsen tağı da arttırırğa mömkin bit. Qayber belgeçlär fikerençä, Rusiädä bulası saylawlar aldınnan bu bik tä ixtimal.

ali ğilmi
XS
SM
MD
LG