Accessibility links

сишәмбе, 6 декабрь 2016, Казан вакыты 06:00

Libanda 2 namzätne sayladılar


Libanda bügen ike deputat urınına yaña namzärlärne saylıylar. Bügenge tawış birü il öçen alda torğan prezident saylawları aldınnan sınaw bularaq bäyälänä. İldä säyäsi wazğiät kierenke bulıp qala, östämä iminlek çaraları kürelde.

Beirut şähärennän tönyaq-könçığışqa taba urnaşqan küpçelege xristiannar yäşägän Metn bistäsendä uzğan yılnıñ noyaberendä atıp üterelgän elekke sänäğat ministrı Pierre Gemayel urınına namzät saylıylar. Anda wazğiät ayıruça kierenke, dip xäbär itelä.

Başqalanıñ ikençe ber bistäsendä, 13 yün könne atıp üterelgän sönni Wälid Eido urınına keşe saylıylar, anda wazğiät çağıştırmaça tınıç. Anıñ urınına däğwa itkän Möhammäd äl-Ämin İtani, tawışlarnıñ küpçelegen alır dip farazlana.

Saylawlar Qazan waqıtı belän kiçke 7dä tämamlana.

Metn bistäsendä üzeneñ ulı urınına elekke Liban prezidentı Amin Gemayel saylanırğa tırışa. Anı xakimiättäge Süriä yaqlı koalisiägä qarşı köçlär täqdim itte. Oppozisiädäge İrekle Patriotlar Xäräkäte citäkçese Michel Aoun, şulay uq xristian, Kamil Xuri isemle tabip belän köndäşlek itä.

Metn şähärendäge Alexander isemle ber tawış birüçe, oppozisiä Pierre Gemayelne ikençe tapqır üterergä tırışa, dide:

"Bu saylawlarnıñ – ber firqa ciñüennän tış mäğnäse yuq. Bu urın – Pierre Gemayelnıqı ide, häm min anı qabat üterergä tırışqan keşelärgä qarşı tawış birergä kildem."

Uzğan atnada Aoun häm Gemayelnı yaqlawçılar arasında bäreşelär buldı. Metn bistäsenä bügen östämä iminlek köçläre kiterelde. İsertkeç eçemleklär satqan tönge klublar häm barlar yabıq.

İrtägedän başlap – feyerverklar atu tıyılğan, irtägä köndez saylaw näticäläre bilgele bulır dip kötelä.

Aoun Süriä yaqlı oppozisiäne könbatışnı yaqınraq kürgän Fuad Simiora xökümätenä qarşı köräşergä çaqıra. Gemayel häm anıñ tarafdarları Süriäne – ulı Pierrenı häm Süriägä qarşı bulğan başqa säyäsätçelärne üterügä qatnaşı bulularında ğäyepli.

Süriägä qarşı küpçelek, Süriä Libannı üz kontrolenä alırğa tırışa, dip belderä. Dimäşk monı kire qağa.

Süriä yaqlı prezident Emil Lahoudenıñ prezidentlıq möddäte 23 noyaberdä betä. Bügenge saylawlar – alda torğan tawış birügä dä täsir iter dip farazlana.
XS
SM
MD
LG