Accessibility links

якшәмбе, 11 декабрь 2016, Казан вакыты 07:21

Äfğanstan häm Paqstan wäkilläre Kabulda "solıx mäclesenä" cıyıldı


Atnakiç könne Kabulda 650-läp Äfğanstan häm Paqstan wäkilläre qatnaşında Solıx mäclese açıldı. 3 kön baraçaq bu cıyında ike ilneñ wäkilläre töbäktäge ğisyannı beterü yulların ezliäçäk. Qayber tanılğan aqsaqallar häm Paqstan prezidentı Pärwäz Möşärräf cıyında qatnaşudan baş tartuğa qaramastan, taraflar aña ömetlär bağlıy.

İke kürşe il, Äfğanstan häm Paqstannıñ xökümät räsmiläre, qabilä citäkçeläre, tanılğan şäxesläre 3 kön buyına zur tirmä astında bergäläp Äl-Qaidä häm Taliban suğışçılarına qarşı toru yulların ezlärgä cıyına.

Äfğanstan prezidentı Xämit Qarzai üzeneñ bügenge çığışında Äfğanstan belän Paqstan Äl-Qaidä belän Talibannı bergäläp xäräkät itsä genä ciñä ala dide:

"Ägär problem, xata Äfğanstan yağında bulsa, ul anı tanırğa häm tieş bulaçaq. Paqstan yağında bulsa – alar xäl itergä tieş. Problem qabilälär arasında bulsa – çişü yulların alar ezärgä tieş" dide Karzai.

Paqstan prezidentı Pärwäz Möşärräf cıyında qatnaşudan soñğı minutta baş tarttı. Paqstannı premier-ministr Şäwkät Aziz wäkillek itä. Äfğan räsmiläre, bu cıyınnıñ däräcäsen hiç kenä dä kimetmi di.

Şulay da, qayber küzätüçelär cıyınnıñ näticäle buluına şiki belderä. Berençedän, Paqstannıñ iñ qaynar töbäkläre sanalğan Tönayq häm Könyaq Wäziristan vilayätläre mäcleskä kilmägän. İkençedän, anda Taliban wäkilläre dä yuq.

Ämmä Karzainıñ matbuğat wäkile Humayun Xämitzadä süzlärençä, Taliban solıxqa bareber ışanmıy, şuña kürä anıñ bulmawı möxim dä tügel:

"Qayber çaqırılğan keşelär, törle säbäplärdän, kilä almadı, bu döres. Läkin küp kenä däräcäle qabilä häm din citäkçeläre, xökümät räsmiläre monda. Bar mäsälälärne yaxşılap tikşerü öçen böten şartlar bar" dide Humayun Xämitzadä.

Bu solıx mäclesen oyıştırırğa Äfğanstan, Paqstan häm Amerikan prezidentları uzğan yıl Washingtonda ütkän oçraşuda kileşkän ide.

Äfğanstan da, Paqstan da Quşma Ştatlarnıñ möxim berektäşe bulıp tora, läkin töbäktäge ğisyan öçen alar ber-bersen ğayepli.

Räsmi Kabul Paqstannı Taliban häm Äl-Qaidä suğışçıların sıyındıruda ğayepli.

İslamabad monı kire qağa häm Äfğanstanda üsä barğan ğisyannı anıñ eçke qarşılıqları belän añlata.

Kabulda açılğan 3 könlek solıx mäclese ike kürşe arasındağı qarşılıqlarnı kimetep, xezmttäşlek başlaw öçen berençe möxom adım dip sanala.

ali ğilmi
XS
SM
MD
LG