Accessibility links

пәнҗешәмбе, 8 декабрь 2016, Казан вакыты 21:05

Qabulda Solıx cıyını tämamlandı


Bügen Äfğanstan başqalasında 700läp Paqstan-Äfğan qabilä başlıqları qatnaşında uzğan Solıx cıyını tämamlandı. Cıyında – ike ilgä dä qurqınıç tudırğan Talibanğa qarşı köräştä berläşergä çaqıru yañğradı. Bügen ike il wäkilläre aldında Paqtsan prezidentı Pärwäz Möşärräf çığış yasadı.

Paqstan prezidentı üz çığışında, dönyanıñ başqa illäre – iqtisadi üseş öçen çaralar kürgändä, Paqstan belän Äfğanstan ekstremizmnıñ "iñ qarañğı çağılışına" qarşı totırğa tieş, dide.

İke il qatnaşında mondıy Solıx cıyını berençe tapqır uzdı. Anıñ maqsatı – Äl-Qaida häm Talibanğa qarşı köräştä köçlärne berläşterü ide.

Cıyınnı açqanda Möşärräf yuq ide, üz urınına ul premyer-ministr Şäükät Aziznı cibärde. Mäğlümat agentlıqları xäbär itüençä, Möşärräf, AQŞ däwlät sekretare Condoleezza Rice belän telefon söyläşüennän soñ cıyınğa kilergä bulğan.

Paqstan da, Äfğanstan kebek köç qullanunıñ artuın kürde, häm ike il ütkän zamannar ruxında yäşärgä tieş tügel, dide Paqtsan ilbaşı.

İke ilne, Möşärräf ber bersen doşman itep kürüdän tuqtarğa häm Taliban suğışçılarına qarşı berläşergä çaqırdı. Üz çığışın Urdu häm İngliz tellärendä yasağan Möşärräf, "ike ilneñ dä yazmışı urtaq" dide.

Cıyınnı açqanda Äfğanstan prezidentı da – Äfğanstan belän Paqstan xezmättäşlek itsä – Äl-Qaida häm Talibannı ciñä alırlar ide, dide.

Mondıy belderülärgä qaramastan, küzätüçelär – cıyınnıñ näticäse bulır dip ışanmıy, di İrekle Äfğanstan radiosınıñ Qabuldağı xäbärçese Breşna Nazari:

"Xökümät basmaları cıyın näticäläre häm anda qabul itelgän qararlarğa zur ömetlär bağlıy. Ber ük waqıtta Qabulda çıqqan bäysez gazetlar, cıyın qararlarına şiklänep qarıy. Alarnıñ kübese, qararlarnıñ Äfğan häm Paqstan qabilä aqsaqalları tarafınnan qabul itelüe, alarnıñ tormışqa aşırıluın häm äfğan wä paqstan räsmiläre tarafınnan ğamälgä quyılaçağın äle añlatmıy, dip yaza."

Cıyında qatnaşuçılar bügen "terrorğa qarşı kiñ qırlı ozın möddätle kampaniä" iğlan itte häm "Äfğanstan wä Paqstan xökümätläre üz cirlärendä terrorçılarnı öyrätü yä sıyındıru üzäklärenä röxsät birmäskä tieş" dip belderde.

Bügen qabul itelgän möräcäğättä şulay uq terrorğa qarşı çaralar kürü häm alarnı näticäleräk itü öçen urtaq şura tözü turında äytelgän.

"Terror – ike il öçen dä qurqınıç tudıra, häm aña qarşı suğış – ike ilneñ dä eçke säyäsäte häm iminlek strategiäse mäsäläse bulırğa tieş", dielgän möräcäğättä.

Äfğanstan belän Paqstan arasındağı mönäsäbätlär soñğı yıllarda naçarayğan ide. Äfğan räsmiläre Paqstannı Äl-Qaida suğışçıların sıyındıruda ğäyepläde. İslamabad, suğışçılarğa qarşı köräş alıp barıuın belderep, ğäyepläwne kire qağıp kilde. Paqstanda şulay uq Äl-Qaidanıñ berniçä yuğarı citäkçese qulğa alınğan ide.

Äfğan prezidentı Hamid Qarzai, Solıx cıyını "yaxşı näticälär häm ike il öçen dä möräcäğät qabul itü belän" tämamlandı, dip belderde.

İrekle Äfğanstan radiosı xäbär itüençä, Paqtsanda da şundıy cıyınnıñ ütüe kötelä, ämma tögäl waqıtı äle bilgelänmägän.
XS
SM
MD
LG