Accessibility links

чәршәмбе, 7 декабрь 2016, Казан вакыты 15:24

Urıs natsilarınıñ ber dağstanlı häm ber taciqnı cäfalap üterüen töşergän video dönya kürde


Mäskäw belän Piterbur arasındağı timer yul qazası xäbärläre tağın da dähşätleräk ikençe ber waqiğäne tämam iğtibar üzägennän çitkä alıp taşladı, xörmätle tıñlawçılar. Yäkşämbedä İnternettağı säxifälärneñ bersendä Rusiädäge urıs natsilarınıñ ber dağstanlı häm ber taciqnı wäxşilärçä cäzalap üterüen töşerep alğan video çıqtı. Eçke eşlär ministrlığı xäzer şul tasmanıñ çınlığın tikşerä başladı, dip xäbär itelä.

İnternetqa quyılğan bu videosürät üzeneñ qansızlığı, wäxşilege belän şul xätle teträndergeç ki, bu xaqta yazu ğına da normal'' keşedä ise-aqılına sıymaslıq toyğılar uyata.

Anda başta, urman eçendä qul-ayaqları bäylängän ike ir-yegetneñ tezlängän xäldä toruı töşerelä. Alar artında zur natsi tärese yasalğan äläm tartılıp elengän. Şunnan soñ elektron muzıka astında älege ike biçara yanına olı gäwdäle bilgesez ber keşe kilep, alarnıñ bersen çın mäğnäsendä pıçaq belän suya, gäwdädän ayırılğan baş sürätläre kürsätelä, ä annarı ikençesen yaqınnan başına atıp elek qazılğan çoqırğa tertep töşerä. Videonı şuşı urınğa qädär qararğa köçe citkännär, sürätlärneñ ifrat ta qansız buluın bilgeläp ütä.

Ütereler aldınnan berse Taciqstannan, ikençese Dağstannan dip tanıştırılğan şul keşelär üzläreneñ urıs natsional-sotsialistları-Aq Qüwät dip atalğan oyışma tarafınnan totqarlanuın äytä. Video azağında bu cinayättä qatnaşqan ike keşeneñ qulların natsi sälämläwendä kütärep toruı kürsätelä.

Berençe soraw bulıp, älbättä, mondıy wäxşilekne çınlıqta eşläw mömkinme, bu video çınmı, digän soraw tua. Rusiädäge näfrät cinayätläre tarixında alarnı aldan töşerep İnternetqa quyu oçraqları elek tä bulğaladı, xätta qıynawlarnı ğına tügel, üterü oçraqların da. Ämma elek belgeçlär andıy cäzalaw sürätläreneñ uynalğan buluın raslap kilde. Xäzergese isä üzeneñ çın bulğanğa oşap toruı belän üzençälekle, dip yaza Komsomolskaya Pravda basması. Ul sişämbedä bu xaqta yazıp çıqqan azsanlı basmalarnıñ berse ide.

Rusiäneñ eçke eşlär ministrlığı videonıñ çınlığın tikşerü üteneçe belän prokuraturağa möräcäğät itkän. Älegä ministrlıqnıñ kibernetik cinayätlärne tikşerüçe K bülege wäkile, LiveJournal säxifäsendä elengän şuşı dähşätle videonıñ çit illärdäge serverlarda buluı açıqlandı, dip kenä belderde. Yäkşämbedä video yaqınça 18 säğät İnternetta elenep torğan, annarı ğına anı alğannar.

İnde äytelgänçä, Rusiädäge mäğlümät çaraları bu temağa älegä bötenläy qağılmıy. Alar nigezdä Mäskäw-Piterbur timer yulındağı qazanı, xakimiätneñ, bu Tönyaq Kavkazdağı wäzğiätkä bäyle diülären yaqtırta. Qaçaqlar häm mäcbüri immigrantlarğa sivil yardäm komitetı räise Svetlana Ganuşkina, bu xakimiätlärneñ ildä arta barğan rasaçıl cinayätlärne häm höcümnärne kürmäskä tırışuın çağıldıra, dip isäpli.

"Bezgä andıy oçraqlar turında kön sayın xäbär itep toralar, häm bu inde xäzer kiñ-küläm tös ala. Bez moña xoquqsaqlaw häm mäxkämä oyışmalarınıñ da niçek qarawın kürep torabız - här şundıy oçraq sayın bezgä normal tikşerenü ütkärü häm ğäyeplelärne xökem itügä ireşü öçen yarılırğa tieşbez", di Svetlana Ganuşkina.

Rusiädä rasaçıl höcümnärne terkäp barğan Sova üzäge mäğlümätenä qarağanda, şundıy höcümnärdä bıyıl ğına da 37 keşe hälak bulğan. Yül başında ğına Piterburda urıs faşistları tarafınnan 23 yäşlek tatar yegete Damir Zäynullin yawızlarça çänçep üterelgän ide.

Kärim Kamal
XS
SM
MD
LG