Accessibility links

пәнҗешәмбе, 8 декабрь 2016, Казан вакыты 23:21

18 avgust Qazaxstanda Mäcles saylawları


Şimbä 18 avgust könne Qazaxstanda parlamentnıñ tübän pulatı – Mäcleskä saylawlar ütäçäk. 2009nçı yılda Qazaxstan Yevropada İminlek wä Xezmättäşlek Oyışmasında räislek itergä teli. Xalıqara cämäğätçelek saylawlarnıñ ğadel häm irekle şartlarda ütüen taläp itä. Qazaxstanda tawış birüne irtägä Yevropa Berlege wäkilläre küzätäçäk.

Qazaxstan oppozisiäseneñ irtägä parlamentta üz wäkillären arttıru öçen bik yaxşı mömkinlek bar. 2004nçe yılğı Mäcles saylawlarında 77 urınlıq Mäclestä ber genä urınnı oppozisiä wäkile alğan ide. Häm xäzer küplär, Alixan Baimenov isemle ul keşene äle dä oppozisiä dip atap bulamı dip şiklänä başladı.

Qazaxstan 2009nçı yılda Yevropada İminlek wä Xezmättäşlek Oyışmasında küçep yörgän räislek wazifasın üzenä alırğa ömet itä. Älegä oyışmanıñ qayber äğzaläre – Qazaxstanda demokratik reformalar tieşle tizlektä barmıy häm ber tawış birü dä – xalıqara qanunnarda qabul itelgänçä irekle häm ğadel bulmadı, dip belderä.

İrtägä Qazaxstannıñ 9 millionğa yaqın saylawçısı – 7 partiä namzätläre arasınnan deputatlar saylayaçaq. 8nçe – Kommunistlar firqase saylawlarda qatnaşudan baş tarttı.

Ämma ilneñ üzendä dä, tışında da saylaw näticälärenä şiklänüçelär bik az. Farazlarğa qarağanda, prezident Nursoltan Nazarbayev citäkçelegendä xakimiättäge Nur Otan partiäse tawışlarnıñ küpçelegen alaçaq.

Mäcleskä ütär öçen 7%lıq kirtäne tağın 2 partiäneñ ütü ixtimalı bar. Sosial Öyränülär Üzäge wäkile Asıl Abdulov, Azatlıq radiosına, Sosial-demokratlar namzätläreneñ şansları yuğarı, dip söyläde:

"Aq Zhol partiäsennän qala başqa 5 partiäneñ 7%lıq kirtäne aşu mömkinlege yuq."

Şulay uq fiker beleşülärgä qarağanda, soraştıruda qatnaşqan xalıqnıñ yartısı ğına saylawlarğa barırğa cıyına. Barıber küpçelekne xakimiättäge Nur-Otan firqase alaçaq, dip, xalıq saylawlarğa yörüneñ mäğnäsen kürmi.

Qazaxstanğa parlament häm prezident saylawlarına üz küzätüçelären elek tä cibärgän Yevropada İminlek wä Xezmättäşlek Oyışmasınıñ ber wäkilçelege, ildä ber tawış birü dä ğadel häm irekle bulmadı, dip beldergän ide. Bu yulı zarlanular küp bulmadı, alay da Sosial-Demokratik partiä – mäğlümat çaralarınıñ Nur-Otan firqase faydasına eşläwen äytep kilä. Oppozisiä wäkile Ämircan Kosanov, moña qayber misallar kiterä:

"Menä "Üskän Ongir", yağni Tuğan Yaq basmasında çıqqan mäqälädän özek: "xalıq, här töbäkneñ här watandaşın çınnap torıp qayğırtqan , Aral diñgeze problemaların çişergä tırışqan berdän ber köç ul – yaratqan prezidentıbıznıñ Nur-Otan partiäse ikänen añlarğa tieş." Menä ikençe mäqälä: iseme - "İlem Qazaxstan, Partiäm – Nur-Otan" dip atala. Nur-Otannıñ eşe – bezneñ däwlätçelegebezneñ nigeze. Alar Nur-Otan turında yazğanda xattä allahı tağäläneñ 99 isemen iskä ala... "

Şimbä könne Qazaxstannıñ 107 urınlıq Mäclesneñ 98 urınına namzätlär saylanaçaq, qalğan 9 urınğa deputatlar Qazaxstan xalıqları assambleyasınnan bilgelänäçäk.
XS
SM
MD
LG