Accessibility links

дүшәмбе, 5 декабрь 2016, Казан вакыты 11:38

Fransiä tışqı eşlär ministrınıñ Ğiraq säfäre AQŞ belän mönäsäbätlärne yaxşırtu omtılışın kürsätä


Ğiraq suğışınıñ başınnan birle AQŞ citäkçelegendäge köçlärneñ ilgä bärep kerüenä qarşı çığıp kilgän Fransiä berençe märtäbä üzeneñ yuğarı räsmien Bağdadqa cibärde. Fransiä tışqı eşlär ministrı Bernard Kouchnernıñ bu säfäre aldınnan ğına Fransiä prezidentı Nicolas Sarkozy AQŞ prezidentı George Bush belän oçraşqan ide. Bu xällär ike il arasında mönäsäbätlärneñ yaxşıruın kürsätü tırışlığı bularaq qabul itelä.

Uzğan yäkşämbedä Ğiraqqa 3 könlek säfären başlağan Bernard Kouchner Bağdadqa kilep töşkäç tä anda prezident Cäläl Talabani çaqıruı belän kilgänlegen belderde.

Kouchner yaña täqdimnär belän tügel, ä kiresençä tıñlarğa kilgänlegen äytte.

Şul uq könne matbuğat oçraşuında ul Yewropa Berlegendä äğza bulğan ilneñ mondıy mönäsäbäte iğtibarnıñ artuına kiterer dide.

Elegräk Kosovodağı BMO idaräsen citäklägän Kouchnernıñ bu säfäre bik tä simvolik säfär bularaq sürätlänä.

4 yıl elek ul çaqtağı Fransiä prezidentı Jacques Chiracnıñ Ğiraq suğışına qarşı oppozitsiäne citäkläwe AQŞ-Fransiä arasındağı mönäsäbätlärne şaqtıy suıtqan ide.

Ul çaqta xätta AQŞ Wäkillär Pulatınıñ aşxanäsendä French fries dip atalğan qızdırılğan bäräñgeneñ isemennän Fransiägä işaräne alıp atıp Freedom Fries dip üzgärttelär.

Ämma uzğan may ayında Fransiädä xakimiätkä Amerika yaqlı prezident Nicolas Sarkozy kilde.

Sarkozy 2 atna çaması elek kenä AQŞ prezidentı George Bush belän oçraştı, anıñ yortına töşke aşqa qunaq bulıp bardı.

Sarkozy yaqındağı New Hampşir ştatına yal itärgä barğan ide. Ämma Bushlar ğailäsenä aña bik ozın yul aşa ütärgä turı kilde. Sarkozy başta möhim cenazada qatnaşu öçen Fransiägä oçtı, annan soñ Bushlar belän hamburger aşarğa kire Amerikağa qayttı.

Bu xällär mönäsäbätlärne yaxşırtu omtılışın kürsätüçe dälillär bularaq qarala. Aq Yort süzçese Tony Snow Sarkozy säfärenä berniçä kön qala "Fransiä belän mönäsäbätlärdä yaña başlanuçı çor çigendä torabız kebek. Bu yaxşı närsä. Häm prezident Bush başqa däwlät başlıqları belän şäxsi mönäsäbätlär qoruğa ömetlänä. Bu töşke aş şul yünäleşkä turı kilä" dide.

Aq Yort Kouchnernıñ Ğiraq säfären dä xupladı. Süzçe Gordon Johndroe Bu dönyada Ğiraqnı totrıqlı häm imin il itärgä yardäm itü telägeneñ artuına tağın ber misal dide.

Ğiraqta ğäskärläre bulmağan Fransiäneñ nindi rol üti alaçağı älegä açıq tügel.

Şulay da Ğiraq tışqı eşlär ministrı Xoşiär Zebari bu säfär Fransiäneñ Ğiraq belän eşçänlek däräcäse artuına, anıñ tışqı eşlär ministrı eşçänlegenä tiñ däräcägä kütärelüenä kitersen ide dip teläwen äytte..

Düşämbe könne premyer ministr Nuri äl-Mäliki häm Zebari belän oçraşqan Kouchner Fransiä Ğiraqtağı tatulaştıru eşendä yardäm itärgä äzer, ämma çişeleş barı Ğiraqlılarnıñ üzennän genä kilä ala dide.

Naif Aqmal
XS
SM
MD
LG