Accessibility links

Кайнар хәбәр

Sarkozy İran, Rusiägä qarata qırıs süzlär äytte


Düşämbe könne Fransiä ilçeläre belän bulğan oçraşuda Sarkozy ilneñ tışqı säyäsäte turında kiñ belderü belän çıqtı. Ägär dä İran, atom programmasın tuqtatu öçen xalıqara burıçın ütämäsä – aña xärbi höcüm ixtimalı yanıy, dide prezident. Häm şunda uq – xärbi höcüm ixtimalın – faciğa belän tämamlanaçağın belderde. Parij üz säyäsäten üzgärtä, di belgeçlär.

Düşämbe könne Sarkozy Parijnıñ Yelisey sarayında Fransiäneñ törle illärendäge 180 ilçese aldında çığış yasadı. İran, Ğiraq, Rusiä, Qıtay, şulay uq Quşma Ştatları – bu illärneñ här bersenä qağılğan süzlär äytelde bu oçraşuda.

İranğa – atom programmasın tuqtamağan xäldä – xärbi höcüm yanıy digäç – ul xärbi çaralarğa Fransiäneñ qatnaşu-qatnaşmaw ixtimalı turında ber süz dä äytmäde:

"Atom qoralına iä bulğan İran minemçä, qabul itelerlek xäl tügel, häm min süzemne ülçäp söylim. Fransiä berlekneñ çikläwlärne qırıslatu säyäsäten tulısınça xuplıy, ämma İran üz burıçın ütägän oçraqta yullar açıq bulaçaq. Bu säyäsät – xälne faciğağa citkermäwneñ berdänber yulı. Başqa yulı nindi? Başqa yulı – İran bombası yäki İrannı bombalaw."

Belgeçlär şunda uq, Sarkozynıñ tışqı säyäsäte elekke prezident Jacques Chiracnıqınnan nıq ayırılaçağın farazlıy başladı.

Çığışnıñ töp öleşe dönyada Fransiäneñ yaña role turında buldı. Elekke prezident Jacques Chirac yardämendä, Fransiä elek tä, xäzer dä – Amerikanıñ Ğiraqta alıp barğan suğışına qarşı, dide Sarkozy. Häm tarix Fransiäneñ döres yulda bulğanın kürsätte, dip östäde ul.

Fransiä prezidentı İzrailne yaqlawın belderde. Ber ük waqıtta Parij ğaräp däwlätläre belän elemtädä torırğa teli. Sarkozy Fransiäneñ köçle däwlät buluın häm Quşma Ştatlar belän dustanä mönäsäbättä buluın teli.

Parijda Strategik Öyränülär Waqıfı belgeçe Francois Heisbourgnı, Sarkozynıñ İran turındağı belderüeneñ eçtälege tügel, ä anı niçek yasawı aptıraşta qaldırğan:

"Anıñ närsä äytüe möhim tügel, niçek äytüe möhim. Säyäsätneñ töp nigezläre üzgärmi."

Quşma Ştatlar, Fransiä häm Britaniä, Berläşkän Millätlär Oyışmasında İranğa qarata urtaq strategiä tözep kilde, Sarkozy aña qarşı kilgän ber süz dä äytmäde, dide Heisbourg.

Rusiä belän dä Sarkozynıñ Chirac kebek dus bulmayaçağına işarälär bar. Rusiä, xalıqara säxnägä gaz häm neften faydalanıp etep-törtep çığarğa tırışa, dide Sarkozy. Bügenge köndä dönya cämäğätçelege, ayırım alğanda Yevropa, Rusiäneñ dönyadağı problemalarnı çişergä yardäm itüen kötä. Rusiä kebek zur däwlätkä tupas adımnar yasaw kileşmi, dide Fransiä prezidentı.

Fransiä prezidentınıñ bu xisle süzläre kiläçäktä nindi säyäsätkä kiterer digän soraw bügen küplärne qızıqsındıra.
XS
SM
MD
LG