Accessibility links

Кайнар хәбәр

Mäşhür opera yoldızı Luciano Pavarotti wafat


Pänceşämbe irtäsendä 71 yäşendä Italiäle opera yoldızı Luciano Pavarotti wafat buldı. Bıltır anda yaman şeş awıruı tabılğan ide. Ğömereneñ soñğı säğätlären ul tuğan şähäre Modenada ğailäse belän bergä uzdırdı.

Bügen bar dönya anıñ belän xuşlaşa. Pavarotti yuğarı sänğät däräcäsendäge muzıkanı kiñküläm xalıqqa citkerügä ğayät zur öleş kertte. 2004 yılda matbuğat oçraşuında Pavarotti "Min keşelärne bäxetle itäm. Alla miña ayırım nider birgän. Ul minem tawış cıllarımnı üpkän. Min şunı beläm" digän ide.

Pavarottida muzıqağa mäxäbbät äle Modenada yäşägändä keçkenädän ük tärtbiälänä. Atası, ikmäk peşerüçe häm sälätle cırçı ul çornıñ bik küp tenorlarınıñ cırları yazılğan tälinkälär tuplağan bula.

9 yäşendä Pavarottinı cirle çirkäw xorına birälär.

1965 yılda Milannıñ La Scala, Londonnıñ Covent Garden säxnälärendäge çığışları anıñ zur säxnädäge berençe zur uñışları bula.

1990 yılda Puccininıñ Turandot operasınnan Nessun Dorma ariäsen başqaruı Pavarottinı superyoldız däräcäsenä kütärä.

Nessun Dorma şul yılda BBCnıñ Italiädäge dönya futbol berençelegen yaqtırtu muzıkası bula häm Pavarottinıñ iñ mäşhür cıyına äwerelä.

Dönya Berençelegeneñ final kiçendä Pavarotti, häm tağın 2 tenor Placido Domingo belän Jose Carrerasnıñ Rimda yazdırılğan konsertı bügenge köngäçä iñ yaxşı satılğan klassi yazma bulıp qala birä.

90-nçı yıllarda 3 Tenor bularaq tanılğan bu törkem dönyanıñ törle urınnarında açıq hawada çığışlar yasap yözlärçä meñ tamaşaçı cıya, ul çığışlarnı televidenie aşa tağın millionnarça keşe qarıy.

Londonnıñ Patşa Opera Yortı bügenge belderüendä Pavarotti "bar dönya buylap törle hönärdäge keşelärneñ tormışlarına täesir itkän siräk bula torğan artistlarnıñ berse ide" di.

Luciano Pavarotti şimbä könne tuğan şähäre Modenada cirlänäçäk.
XS
SM
MD
LG