Accessibility links

Кайнар хәбәр

9/11: AQŞta 6 yıl elek bulğan terror ğamällären iskä alalar


11 sintäber New Yorktağı Säwdä Üzäge Manaralarına bulğan terror höcümenä 6 yıl tuldı. Ul könne 80 millät wäkilläre, 3 meñgä yaqın keşe häläk buldı.

2001neñ 11nçe sintäbere New Yorkta qoyaşlı, çamadan tış cılı kön ide. Şähär xalqı irtän eşkä aşıqtı. İrtänge 8.46da Manhattan östendä Boeing 757 oçqıçı kürende, oçqıç 417 metrlıq Dönya Säwdä Üzägeneñ ber manarasına kilep bärelde.Oçqıçta 94 keşe häm oçuçılar bulğan. Berençelärdän bulıp bu xäbärne dönyağa CNN televideniä kanalı tarattı:

"Sez turı efirda bik tä borçulı xälne küräsez. Bu Dönya Säwdä Üzäge, äle raslanmağan mäğlümatlärgä qarağanda, manarağa oçqıç kilep bärelgän."

Berençe oçqıçtan soñ 17 minut uzğaç, ikençe şartlaw işetelde.. ABC xäbärçese ul xaqta äle berençe şartlaw turında söyli ide...

"Qotqaru eşläre äle başlanmağan, isegezgä töşeräm"...... /i> digändä ikençe manarağa tağın ber oçqıç kilep bärelde. United Airlines hawa yulları şirkäte oçqıçında 53 yulçı häm oçuçılar bar ide. Monıñ aldan planlaştırılğan terror höcümnäre buluında şik qalmadı. Prezident George Bush ul säğatlärdä Florida ştatında başlanğıç mäktäptä uquçılar belän oçraşa ide, anıñ xalıqqa märäcäğäte 9.29da yañğradı:

"Min vise-prezident, New York şähär başlığı, federal iminlek xezmäte başlığı belän söyläştem. Federal xökümättän qorbannar ğailälärenä yardäm bülep birüne soradım häm bu ğamälne oyıştıruçılarnı tabarğa häm tikşerergä färman birdem. İlebez terrorğa tüzep tormayaçaq."

Höcümnär däwam itte. Bush çığışınnan soñ 10 minut uzğaç Waşingtonnıñ Dulles hawa alanınnan kütärelgän oçqıçnı 5 intixarçı Pentagonğa kiterep bärde, anda 125 keşe häläk buldı.

New Yorkta Dönya Säwdä üzägennän meñnärçä keşe çığa almıy qaldı, şaxitlärneñ berse:

"Keşelär täräzälärdän sikerä, min 13-14 keşene kürdem, qotoçqıç bu, üz küzemä ışanmıym."

Ber manara cimerelep töşkändä San Franciscoğa yul totqan oçqıçnı terrorçılar Waşingtonğa borğan digän xäbär taraldı. Oçqıçtağı yulçılar tuğannarına şaltratıp ölgergän bulğan. Berniçä minuttan oçqıç Pensilvaniä qırlarında şartladı.

İrtänge 11nçe yartıda Dönya Säwdä Üzägeneñ ikençe manarası da cimerelde.

Höcümnärdä 2800 artıq keşe, alar arasında 343 yanğın sünderü xezmätkärläre häläk buldı.

Şul uq könne Rusiä prezidentı Vladimir Putin Amerikan xalqınıñ qayğısın urtaqlaştı:

"Bügen bulğan xällär tağın ber tapqır, terrorğa qarşı köräştä xalıqara köçlärne berläşterü kiräklegen kürsätte. Terror ul 21 ğasır afäte. Rusiä terrornıñ närsä ikänen belä, şuña kürä bez Amerikan xalqın yaxşı añlıybız."

Germaniäneñ ul çaqtağı kanslerı Gerhard Şröder:

"Bu böten sivilizasiägä qarşı suğış iğlan itü."

2001nçe yılnıñ 11 sintäberendä kiçke säğat 9da prezident Bush, höcümnär öçen cawaplı bulğannarnı tabarğa wäğdä itte.
XS
SM
MD
LG