Accessibility links

якшәмбе, 11 декабрь 2016, Казан вакыты 11:12

Saylawlar aldınnan Putin xökümätne tarata häm yaña premyer-ministr täqdim itä


Çärşämbe könne Rusiä prezidentı Vladimir Putin premyer ministr Mixail Fradkovnıñ wazıyfasınnan kitü turındağı möräcäğäten qabul itte. Şunnan soñ uq prezident Däwlät Dumasına Rusiä Finans Küzätüe xezmäte başlığı Viktor Zubkovnı premyer-ministr itep raslaw täqdimen yulladı.

Fradkov ta, Putin da bügen Mäskäw Kremlendä oçraşu waqıtında xökümät almaşın möhim säyäsi waqıyğalar yaqınlaşu belän bäyläp añlattı.

"Sezgä aldağı säyäsi waqıyğalar belän bäyle xakimiät qorılışı turında qarar itkändä çikläwlär bulmasın öçen minem yaqtan xökümät räise urının buşatu täqdime belän çığu döres adım dip isäplim" dide Fradkov.

Aldağı säyäsi waqıyğalar digänne dikäberdä ütäçäk parlament saylawları häm kiläse martta kötelgän prezident saylawları dip kötärgä kiräk.

Putin da bu adımnı xuplawın äytte.

"Bälki barıbızğa bergäläp xakimiät häm idarä strukturasın niçek saylaw aldı çorına yaxşıraq turı kilerlek, ilne parlament häm 2008-neñ martındağı prezident saylawlarınnan soñğı çorğa äzerlärlek itep qoru turında uylarğa kiräkter" dide Putin.

Ämma Fradkov älegä, Dumada xökümätneñ yaña räise raslanğançığa qädär premyer wazıyfaların başqarunı däwam itäçäk.

Küp kenä küzätüçelär Putin yaña premyer bularaq berençe vitse premyer Sergey Ivanovnı täqdim itär dip kötkän ide.

Putin tağın ber märtäbä hiç kötelmägän adım yasadı. Küp kenä küzätüçelär Fradkov urının Ivanov alır häm şunıñ belän anıñ kiläse yıldan Putin warisı bulıp qalu mömkinlekläre köçäyteler dip kötkän ide. Ämma Duma räise Boris Grızlov Mäskäwdä jurnalistlarğa başqa keşeneñ isemen iğlan itte.

"Zubkov Viktor. Bügen ul Rosfinmonitoring citäkçese wazıyfasında. Ul zur tormış yulın ütkän. Anıñ hönäri eşçänlegeneñ 30 yılı Leningrad ölkäse belän bäyle" dide Grızlov.

Duma Zubkovnı premyer itep raslaw mäsäläsen comğa könne qarar dip kötelä. Şulay itep premyer urınına täqdim itelgän Zubkov Putinnıñ Piterbur törkeme keşese diärgä mömkin. 1990 yıllarda Putin Piterbur meriäseneñ tışqı elemtälär komitetın citäklägändä Zubkov anıñ citäkçelegendä eşlägän.

Tormış yulına qısqaça ğına küz salıp ütkändä, Zubkov 1941 yılnıñ 15 sintäberendä Swerdlaw ölkäsendä tuğan. Leningrad awıl xucalığı institutınıñ iqtisadıy fakultetın tämamlağannan soñ Leningrad ölkäsendä awıl xucalığında törle däräcädäge citäkçe wazıyfalarda eşlägän. Soñraq Sovetlar berlege cimerelgän yıllarda Leningrad ölkä başqarma komitetı räiseneñ berençe urınbasarı bulğan. 92-93nçe yıllarda Piterbur tışqı elemtälär komitetında Putinnıñ urınbasarı.

Ämma Putin anı xökümät citäkçelegenä täqdim itsä dä, küzätüçelär bu Ivanovnıñ, yäki şulay uq berençe vitse premyer Dmitriy Medvedevnıñ kiläçäktä waris bularaq täqdim itelü mömkinlekläre kimi digänne añlatmıy di. Mäskäwdäge Heritage Foundation waqıfı mödire Yevgeniy Volk mäsälän, , Putin kemgä kürsätsä şul bulır, Ivanov ta, Medevedev ta, timer yullar başlığı Vladimir Yakuni da bula ala. Ul täqdim itkän keşene Prezident saylawlarına qädär xalıqqa kiñräk tanıtu, anıñ däräcäsen kütärü öçen äle waqıt bar di.

Naif Aqmal
XS
SM
MD
LG