Accessibility links

җомга, 9 декабрь 2016, Казан вакыты 10:58

Zubkov Rusiäneñ yaña premierı buldı


Comğa könne Rusiäneñ yaña xökümät citäkçese buldı. Prezident täqdim itkän Viktor Zubkovnı Däwlät Duması, aldan kötelgänçä, bu urınğa rasladı. Zubkov üzeneñ çığışında Putin säyäsäten däwam itäçägen belderde.

Rusiä Dumasınıñ comğa utırışı inde onıtılıp betkän sovet çorların xäterlätte. Forsat bulğan sayın kommunistrlarğa qarşı çäçräp çığa torğan Jirinovskinı iskä almağanda, telgä alırlıq çığışlar bulmadı diärlek.

Xökümät citäkçese urınına täqdim itelgän Viktor Zubkov deputatlar aldında çığış yasap, berniçä sorawğa cawap birgännän soñ, mäsälä tawışqa quyıldı. 381 deputat uñay, ni barı 47-se qarşı tawış birde. Komunnistlar qarşı tawış biräçäklären aldan äytep quyğan ide.

Äytkändäy, Rusiäneñ här kiläse premierı elekkese belän çağıştırğanda kübräk tawış belän raslana. Zubkov Dumada iñ küp tawış cıyğan premier buldı. Äytik, 1999 yılda Putin premier urınına ni barı 233 tawış belän raslanğan ide.

Premier bulır aldınnan 7 yıl finans küzläw idaräsen citäklägän Zubkov töp maqsatlarınıñ berse itep korrupsiägä qarşı köräşne atadı:

"Korrupsiä cämğiätebezgä señep kergän. Mömkin qädär tizräk çaralar kürergä kiräk. Başlap, korrupsiä turında qanun qabul itergä. Çönki bu turında küp söylibez, ä anıñ närsä ikänen, aña qarşı niçek köräşergä ikänen berkem belmi" dide Rusiäneñ yaña premierı.

Üzlären tiskäre yaqtan kürsätkän sotsial tarmaq citäkçeläre, äytik sälämätlek häm sotsial üseş ministrı Mixail Zurabov kebek räsmilär urınınnan alınaçaqmı, digän sorawğa:

"Sotsial tarmaqta problemnar küp cıyıldı, xalıq qänäğät tügel, üzgäreşlär ölgerde, tieşle çaralar küreläçäk" dide Rusiäneñ yaña premierı.

Säwdä häm finans ministrları German Gref belän Aleksei Kudrinnı telgä almıyça ğına, Zubkov iqtisadi tarmaqnı üz qaramağına alaçağın belderde. Şulay uq, Putinnıñ iqtisadi säyästen däwam itergä, ilneñ xärbi quäten köçäytergä wäğdä itte:

"Tağın ber strategik maqsat – saqlanu-sänäğät tarmağın üsterü. Büdjetta moña aqça qaralğan. İñ moxime – anı döres itep qullanu häm kontrolne täemin itü" dide Rusiäneñ yaña premierı.

Şulay itep Rusiä yaña premierlı buldı. Küplär bu urınğa vitse-premier Sergei İvanov kiler dip kötkän ide. Ämmä Putin hiç kötelmägän adım yasap çirattağı märtäbä küplärne şaqqatırdı.

Qayber küzätüeçlär, Zubkovnıñ premier buluı anıñ kiläse prezident bulaçağın añlatmıy, di. Baqşalar kiresençä, Putinnıñ warisı xäzer mäğlüm, ul näq menä Viktor Zubkov bulaçaq, di. Andıylarnıñ mantıyğı bik ğadi: Putinğa tuğrı bulğan Zubkov waqıtlı prezident bulaçaq. 4 yıldan aña 70 yäş tula häm ul urının kire Putinğa qaldırıp kitäçäk. Bu fikerdä toruçılarğa Zubkov atnakiç könne üze dä cim östäde. Ber jurnalistnıñ, sezneñ prezident bulırğa niätegez yuqmı, digän turı sorawına, ul nik bulmasın, premier wazıyfasın uñışlı ğına başqarsam, andıy ixtimal da bar, digän turı cawap qaytardı.

ali ğilmi
XS
SM
MD
LG