Accessibility links

җомга, 9 декабрь 2016, Казан вакыты 22:24

AQŞ belgeçläre Gäbälä radarın tikşerde


Sişämbedä Quşma Ştatlarnıñ xärbi belgeçläre Äzärbaycanğa kilep andağı Gäbälä radar stansiäse belän tanıştı. Räsmi Mäskäw Waşingtonğa, Yewropada yaña raketa qalqanı qorğançı, şuşı stansiäne bergäläp qullanırğa täqdim itkän ide.

6 keşedän torğan amerikan törkeme Gäbäläğa Baqıdan irtänge säğätlärdä kilde. Qorılmanı qarap çıqqannan soñ, Quşma Ştatlarnıñ raketa höcümennän saqlanu idaräse başlığı urınbasarı general Patrick O''Reilly, bu tanışu säfäre genä ide, bernindi räsmi söyläşülär bulmadı, dip belderde. Bezneñ maqsat – Rusiäneñ täqdimen añlaw ide, dide ul häm Äzärbaycan yağına qorılmanı kürü mömkinlege birgän öçen räxmät belderde. Ul şulay uq, taraflar bu ölkädä xezmättäşlek itü yulın tabır digän ömeten äytte.

Gäbälä stansiäsen Rusiä 2012 yılğa qädär Äzärbaycannan arendağa alıp tora. Mäskäw, şuşı stansiäne Waşingtonğa bergäläp qullanırğa täqdim itte. Älbättä inde, başta Yewropada raketa qalqanı qoru niätlärennän baş tartıp.

Waşington Çexiä häm Polşada qorılası bu qalqannı İran häm Tönyaq Korea kebek illärneñ ixtimal höcümennän saqalnu öçen dip belderä.

Mäskäw moña ışanmıy, häm anı üzenä qarşı adım dip sanıy. Bu niätlärgä cawap itep, Kreml xättä üz raketaların Yewropağa töbäw belän yanağan ide.

Qayber amerikan belgeçläre Gäbälä stansiäsendäge sovet çorı texnologiäsen amerikan sistemnarına yaraqlaştırıp bulaçağına şik belderä. Rusiä xärbiläre, kiräk bulsa, andağı texnologiäne yañartabız, di.

Äzärbaycan yağı isä şuşı ike elekke doşmannıñ qarşılığında üz mänfäğätlären qayğırtırğa tırışa. Äzärbaycan tışqı eşlär ministrlığı süzçese Xacar İbrahim, radiobızğa, bez monda aradaşçı tügel, ä tigez taraf dide:

"Bezneñ Quşma Ştatlar belän strategik partnerlığıbız bar. Rusiä belän dä, İran belän dä kürşelärçä, dustanä mönäsäbätlärebez üsep kilä. Şuña kürä bez bu illär arasında nizaqlar kürergä telämibez. Ğömümän, bu töbäkneñ imin häm totrıqlı bulıun telibez, qızğanıçqa qarşı, ul ozaq waqıt nizaqlar töbäge buldı" dide Xacar İbrahim.

1984 yılda Kaf tawları itägendä qorılğan Gäbälä radarı Sovet berlegeneñ iñ köçle kisätü qorılması sanala ide. Ul Aziädän alıp Afrikağa qädär, 6 meñ çaqırım aranı küzätep tora ala. Stansiädä 900-läp xärbi bar, Rusiäneñ Ğäläm köçläre xärbiläre.

Rusiä häm amerikan belgeçläreneñ raketa qalqanı mäsäläsendä söyläşüläre moña qädär ällä ni näticä birmägän ide. İke ilneñ räsmiläre qatnaşında kiläse söyläşülär üktäber ayına bilgelängän.

ali ğilmi
XS
SM
MD
LG