Accessibility links

дүшәмбе, 5 декабрь 2016, Казан вакыты 15:38

Politkovskaya ülemenä 1 yıl: Blagoveçenda anı yaxşı xäterlilär


“Azatlıq” dulqınında Anna Politkovskayanıñ yıllığına bağışlanğan şälkemne däwam itäbez. Ul “Novoya gazeta” bitlärendä Başqortostandağı Blagoveşçenski waqiğaların da yaqtırtqan ide. Gäzit bu xällärne “millitsiäneñ zur çistartu çarası” itep sürätläde. Bügenge yazmabızda, Anna Politkovskayanıñ Blagoveşçenski waqiğaların tikşerüe häm andağı keşelärneñ istälekläre belän tanışırbız.

2004 yılnıñ üktäberendä, 4 kön buyı Başqortostan millitsiäse Blagoveşçenski şähärendä häm yaqındağı awıllarda maxsus çaraların ütkärde. Anıñ näticäsendä, räsmi çığanaqlar xäbär itkänçä, barlığı 334 keşe qıynaldı häm tän cäräxätlären aldı. “Novaya Gazeta” Blagoveşçenski waqiğaları turında bolay yazğan ide: “Başqortostannıñ bu keçkenä şähärendä kiñ külämle çistartular ütkärelgän. Xoquq yaqlawçılar süzlärenä qarağanda, meñgä yaqın keşe qulğa alınğan. Alarnıñ kübese Ufanıñ maxsus bilgeläneşle millitsiä törkeme tarafınnan qıynalğan. Şähärdä qurqu urnaşqan. Küp keşe, millitsiä yağınnan qaytawaz buludan qurqıp, bu xäl turında xäbär itmägän.

Bu waqiğanı küp jurnalistlar yaqtırtqan bulğan. Ämma başqa cirlärdä , Beslan, Çeçnädäge kebek uq, küp keşelär Anna Politkovskayanı ayıruça cılı süzlär belän iskä ala. Blagoveşenskida yäşäwçe Taisia Zelenenko : “Jurnalistlar küp buldı. Ämma Anna küñelgä kerep qaldı. Berençedän, ul şundıy açıq ide. Bez anıñ ğailäse turında ozaq söyläştek. Bez, anıñ şundyı zur keşe ikänen belmädek tä. Ul nindider urında eşlägännen beldek, xakimiätlärneñ annan qurqıbraq torğanın beldek. Bezneñ yanda nindi keşe bulğanı bezgä soñğınnan ğına, barıp citte bugay.”

Cirle jurnalist Oksana Aseeva Anna Politkovskayağa mäğlümat tuplarğa yärdäm itkän bulğan. Ämma soñğınnan, Annanıñ cirle jurnalistlar buldıra almağan eşne eşlägänen kürgän. “ Min Anna Politkovskayanıñ yazmasın uqığaç, anıñ şuşı faciğale xällär turında bez monda taba almağan äyberlärne qazıp çığaruın kürdem. Ul üzeneñ bäysez tikşerüen ütkärde.”-di Oksana.

Blagoveşçenskidağı çistartularda Galina Bobrovanıñ ülı qatı qıynalğan bulğan. Ul waqıtta aña jurnalistlar belän aralaşu bik awır birelgän. Ämma Politkovskaya belän alay bulmadı, di Galina Bobrova. “Ul minem öçen jurnalist bulmadı. İñ qızığı şunda, min anıñ närsä yazğanın täki uqıy almadım. Alarnı monda tabıp bulmadı, alar monda tıyılğan ide sıman. Mäqälälärne xäzer dä tabıp bulmıy. Ul miña küñelem nıq töşkän mäldä oçradı. Ul waqıtta miña berärse ağu birsä, min anı eçkän bulır idem. Bez söyläşep kenä aldıq. Annan soñ başqa küreşmädek. Min yäşärgä kiräklegen, teläsä nindi şartlarda yäşärgä kiräklegen añladım.”

- di Blagoveşçenski çistartularınnan zıyan kürgän Galina Bobrova. Cirle jurnalist Veronika Şaxova, Anna Politkovskayanıñ närsä eşläp yörgänen täräzäläre qaplanğan maşinada bilğesez keşelär küzätep bardı, dip xäbär itte. Ämma bu Annanıñ küñelen tırnasa da, ul şuşı iğtibarğa humor belän qarıy ide, dip iskä ala Veronika. Anna Politkovskaya, jurnalist bulıp qına qalmıy, xoquq yaqlawçı da buldı, di Veronika Şaxova. “Üzeneñ dönyağa qaraşları belän ul xoquq yaqlawçı ide. Xoquqlar – izge närsälärdän sanala ide. Ul teläsä qaya barırğa, waqıtqa qaramyıça yärdäm kürsätergä äzer bulıp tora ide. Mine ğäzittäge eşemnän çığardılar. Soñ ide inde. Ul şaltırata. Ul çınnan da borçılğan ide. “Veronika, min sineñ turında işettem. Äydä min kilim, bilet alıym da, kilim, siña yärdäm itim. Xällär bolay bulğaç, närsäder eşlärgä kiräk”, dide. Anı sorıysı da yuq ide. Miña qalsa ul, keşelär öçen genä yäşäde, üze öçen tügel, başqa keşelär öçen.” -

dip iskä aldı Anna Politkovskayanı Blagoveşçenskidağı jurnalist Veronika Şaxova. Aña, eştän quuluyın, Blagoveşçenskidağı millitsiäneñ çistartu çaraların yaqtırtqan öçen genä tügel, Anna Politkovskya belän xezmättäşlek öçen dä bulğan, dip beldertkännär.
XS
SM
MD
LG