Accessibility links

пәнҗешәмбе, 8 декабрь 2016, Казан вакыты 17:20

Yevropa Berlege Gazpromnan bäyle buluın kimetü yulların ezli


Brüsseldä bu atnada soñğı berniçä yılda bulmağan kisken qararlarnıñ berse qabul itelde. Yevropa Komissiäse atnakiç könne, Yevropa Berlegeneñ köndäşlek qanunnarın xörmät itmägän çit il şirkätlärenä Yevropa bazarı yabıq bulaçaq, dip belderde. 27 il kergän Berlek yağulıq ölkäsendä üzeneñ Gazprom kebek şirkätkä bäylelegen kimetügä taba adımnar yasıy.

Yevropa Komissiäse prezidentı Jose Manuel Barroso, komissiä utırışında yañğrağan täqdimnärneñ maqsatı – Yevropanıñ gaz häm elektr energiäse bazarında köndäşlek itügä yul açu, dip belderde. Ämma bu söyläşügä böten taraflar da qatnaştırılmadı.

Rusiäneñ Gazprom häm Cäzäirneñ Sonatrach kebek monopoliäläre – üz illärendä yağulıq bazarında başqalarğa da eşlärgä irek birmäsä – Yevropa Berlege bazarına kerä almayaçaq.

Bügen Brüsseldä Barroso jurnalistlar belän oçraşqanda, Gazprom turında turıdan turı söylämäsä dä, Yevropanı gaz belän 25%qa tämin itep torğan bu şirkät telgä alındı. Ayırım alğanda Kremlneñ yağulıq säyäsäten Ukraina, Belarus häm Gruziä kebek illärgä qarşı qoral bularaq qullanuı telgä alındı:

"Ber ilneñ yäki ayırım keşeneñ, kileşü bulmıy torıp, Yevropanıñ yağulıq çeltären üz kontrolenä alu xaqı yuq. İrekle bazar xörmät itelergä tieş. Tağın ber qabantlıym, maqsat ul şirkätlärne Yevropa Berlege bazarınnan çitläşterü tügel, kiresençä, böten taraflarnıñ berdäm qanunnarnı ütäwendä. "

Yevropa Berlegen küptän inde Rusiäneñ energiä bazarına çit il şirkätlären kertmäwe borçıy. Şul uq waqıtta däwlät kontrolendäge Gazprom Yevropada üz urının alğan. Berlinda yäşäwçe yağulıq iminlege belgeçe Joerg Himmelreich, Yevropa Komissiäseneñ bu qararı Rusiäne üzgärtmäs dip sanıy:

"Yaqın kiläçäktä çit il şirkätlärenä bu ölkägä kerü mömkin bulmas, dip sanıym. Gaz quu öleşenä kilsäk, biredä bäyäne gaznı quuçı bilgeli. Rusiä monı töbäktä säyäsi qoral bularaq qullana, häm Rusiä, Putin häm annan soñ kiläçäk keşe monı ber qayçan da üzgärtmiäçäk."

Yevropa Berlegeneñ berdäm yağulıq säyäsäte bulmawı arqasında küptän tügel Gazprom Yevropada berniçä il belän xezmättäşlek kileşülären özde. Xäzer bu şirkätneñ törle formalardağı wäkillekläre Berlekneñ 17 ilendä bar.

Bügen Gazpromnıñ matbuğat wäkile Sergei Kupriyanov, "Gazprom – Yevropanı gaz belän tämin itep torğan iñ ışanıçlı şirkätlärneñ berse, bez Yevropa Berlegeneñ yağulıq bazarınıñ iminlegen häm totrıqlılığın saqlaw maqsatın añlıybız," dip belderde.

Yevropa Komissiäseneñ böten şirkätlärneñ Yevropa qanunnarın ütäwen taläp itüe – Gazpromnıñ qayber zur kileşülärdän çığu kiräklegenä işarä yasıy.

Närsä bu, Yevropanıñ Rusiägä qarşı adımımı dip sorawçılarğa, yağulıq iminlege belgeçe Himmelreich cawabı:

"Beräwlär monı qarşı adım dip äytsä, min bu adımnı – saqlanu çarası dip bäyälär idem. Bu – Yevropadağı xosusi köndäşlekne Gazprom kebek däwlät kontrolendäge säyäsi maşinadan saqlaw."

Bäyälär häm bazarğa mondıy irek birügä Yevropadağı qayber yağulıq şirkätläre dä qarşı çığa, ayırım alğanda Germaniä häm Fransiä şirkätläre. Ämma alarnıñ äle üz pozisiäsen yaqlarğa waqıtı bar. Täqdimnär, Yevropa Parlamentı häm Berlekneñ Ministrlar Şurası tarafınnan xuplanğaç qına ğamälgä kerä ala. Bu isä 2 yıldan da tizräk bulmas, di belgeçlär.
XS
SM
MD
LG