Accessibility links

якшәмбе, 11 декабрь 2016, Казан вакыты 12:59

İnguşetiä yaña "qaynar töbäkkä" äylänäme?


Soñğı atnalarda İnguşetiädän kön sayın diärlek küñelsez xäbärlär kilä. Äle urıs, äle çegän keşelären üterüläe, militsiägä höcümnär, keşe urlawlar, xättä respublika prezidentına höcüm itülär. Şuşı kierenkelek artunıñ säbäbe närsädä?

Soñğı 3 köndä İnguşetiädä 2 militsiä xezmätkäre maşina eçendä atıp üterelde, ber militsiä bülege citäkçese mäçet yanında atıldı, ike xärbi kön urtasında üterelde, soñğı berniçä yılda iñ zur demonstartsiä waqıtında militsiä belän protest belderüçelär arasında bäreleşlär buldı.

Soñğı waqıtta bulğan keşe urlawlarğa protest belderep çärşämbedä başqala Nazrandä uramğa 500läp keşe çıqtı. Qayberläre taşlar ata başlağaç, militsiä hawağa ut açtı.

Küplär bu keşe yuğalular öçen xärbilärne häm iminlek xezmätlären ğayepli häm respublikanıñ zäğif prezidentı, üze dä FSB generalı bulğan Murat Zäzikovnı urınınan kitergä taläp itä.

"İnguşetiä kiçä baş kütärü çigendä ide. Ägär miting tönlä tuqtatılmağan bulsa, qullarına tayaqlar totqan yözlägän keşe bu zäğif xakimiätkä qarşı baş kütärergä äzer ide. Kiläçäktä bu qabatlana ala" dide bäysez jurnalist, ingushetia.ru internet säxifäseneñ baş möxärrirre Magomed Yavloev radiobıznıñ Tönyaq Kavkaz bülegenä.

Atnakiç könne Mäskäwdä ütkän matbuğat oçraşuında İnguşetiä prezidetı Murat Zäzikov respublikadağı xällär küpertelep kürsätelä dide. Soñğı köç qullanular, xättä üzenä qarşı bulğan höcüm turındağı xäbärlärne ul "safsata" dip atadı.

"Teläsä nindi, keçkenä bulsa da, waqiğanı bezdä şunduq kütärep çığalar. Başqa töbäklärdä andıy xällärne telgä dä almıylar" dide İnguşetiä prezidentı.

Rusiä eçke eşlär ministrlığınıñ yül ayında İnguşetiägä östämä 2 meñ xärbi cibärüen Zäzikov ğäskärlärneñ ğädäti xäräkät itüe dip atadı.

Berük waqıtta cirle räsmilär respublikağı wazğiätne qızdıruda islamçı törkemnärne ğayepli. Tegeläre şartlaw-atışularğa bäyleşläre buluın kire qağa.

Radiobıznıñ Kavkaz belgeçe Andrey Babitski fikerençä, kürşe Çeçnädä xakimiätkä Ramzan Qadırov kilgännän soñ suğışçılarnıñ ber öleşe İnguşetiägä ütep kergän.

"Çeçnädä qırıs kontrol urnaştırılğaç, anda suğışu awırlaştı. Qorallı törkemnärneñ zur öleşe İnguşetiägä kilde. Bu xäl inde küptännän bara. Çeçnädäge şikelle diktatura urnaştırılmıy torıp, İnguşetiädä tınıçsızlıq saqlanaçaq" dide Andrey Babitski.

İnguşetiädäge kierenkelekne küplär prezident Zäzikovnıñ zäğiflege, anıñ Kreml aldındağı quştanlığı belän añlata.

İnternetta ütkärelgän fiker beleşüdä 2 meñ keşeneñ meñ-yarımı, Zäzikovnı korrupsiä häm respublikadağı çıbnarlıqnı yäşerüdä ğayepläp anı urınınan alu öçen tawış birgän.

Ämmä Andrei Babitsi fikerençä, Tönyaq Kavkazdağı suğışçılar alar küçep yörüçän. Äytik, İnguşetiädä kontrol urnaştırılsa da, alar başqa töbäkkä, şul uq Dağıstanğa küçä ala.

ali ğilmi
XS
SM
MD
LG