Accessibility links

пәнҗешәмбе, 8 декабрь 2016, Казан вакыты 21:15

Rusiä citäkçelegendä tuğan-tumaçalıq arta


Rusiä prezidentı bu atnada ilneñ yaña xökümäte belän tanıştırdı. Küzätüçelär şunda uq anda uzara tuğanlıq mönäsäbätläre belän bäyle keşelärneñ küp buluına iğtibar itte. Bu Mäskäw Kremlendä äşnälekneñ artıq köçäyep kitmime digän sorawğa säbäp buldı.

Putinnıñ yaña xökümäte äşnälek yağınnan şaqtıy köçle. Saqlanu ministrı premyernıñ kiyäwe. Sänäğät häm energiä ministrı sälamätlek ministrınıñ ire. Yustitsiä ministrı prezident idaräse başlığı irınbasarırnıñ qodası.

Putin Viktor Zubkovnı premyer ministr itep bilgelägännän soñ saqlanu ministrı Anatoliy Serdyukov eşennän kitüen iğlan itte. Serdükov premyernıñ yaqın tuğanı bularaq xökümättä eşli almawın belderde.

Ämma düşämbe könne yaña xökümätne iğlan itkän Putin Serdyukovnıñ ğarizasın kire qağıp anı saqlanu ministrı itep qaldırdı.

Şulay itep qanun xökümät räsmilärneñ üz tuğannarı citäkçelegendä eşläwen tıysa da, Rusidä citäkçelektä tuğan-tumaçalıq, äşnälek mönäsäbätläre ğadäti xäl bulıp qala.

Kommersant Vlast jurnalı sişämbe könne Rusiädä citäkçelektä tuğan-tumaçalıq mönäsäbätlärenä 35 misal kiterde. Şul isemlektä Başqortstan Prezidentı Mortaza Räximovnıñ, Tatarstan prezidentı Mintimer Şäymievneñ, premyer ministrı Röstäm Miñnexanovnıñ tuğannarı da bar.

Oppozitsion säyäsätçe Boris Nemtsov Azatlıq radiosına Rusiäneñ yaña xökümätendäge bu küreneş Putinnıñ citäkçelek itüdä keçkenä törkemgä tayanuınnan kilä dide.

"Minemçä, bu normal närsä tügel. Bu Putinğa kadrlarnıñ bik nıq citmäwen kürsätä. Prezident atna buyı yä Soçida, yä Mäskäwdä, yä Kostromada nindi xökümät tözü turında uylandı. Ämma bernindi yaña närsä dä kilep çıqmadı. Çönki prezidentı ışanmawçan, şiklänüçän keşe. Il bik zur bulsa da, sälätle keşelär küp bulsa da, citäkçelärne ul bik keçkenä törkemnän genä saylıy" dide Nemtsov.

Analitiklar Putinnıñ xökümätne kontroldä totu öçen şundıy xezmätkärlärgä häm tuğanlıq mönäsäbätlärenä tayanuı il öçen zıyanlı mänfäğätlär qarşılığına kiterä ala dip kisätä. Çönki citäkçelär il mänfäğätläre belän ğailä mänfäğätlären butarğa mömkin.

Küzätüçelär şulay uq ğailä törkemnäre arasında qarşılıqlar çığıp xökümät eşçänlegenä zıyan kiterergä mömkin dip tä kisätä.

Federal xökümättä mäsälän sänäğät häm energiä ministrı Viktor Xristenkonıñ xatını Tatyana Golikova sälamätlek häm sotsial mäsälälär ministrlığın citäkli. Yustitsiä ministrı Vladimir Ustinovnıñ ulı Dmitriy Ustinov prezident idaräsendä eşli, citmäsä ul prezident idaräse citäkçe urınbasarı Igor Seçinnıñ kiyäwe dä.

Citäkçelärneñ tuğannarınıñ däwlät qaramağındağı şirkätlärdä, oyışmalarda yuğarı urınnarnı biläwe dä ğädäti küreneş. Federal Iminlek Xezmäte mödire Nikolay Patruşevnıñ ber ulı Andrey däwlät neft şirkäte Rosnefttä mödirlär şurası kiñäşçese, ilençe ulı Dmitriy Vneştorgbank däwlät bankınıñ vitse prezidentı.

Sovetlar Berlegendä citäkçelektä tuğan-tumaçalıq bulsa da, alay uq kiñ taralmağan ide. Boris Yelsin çorında isä matbuğat Kremldä xakimlek itüçe ğailä digän törkem turında küp yazdı. Ul törkemgä Yeltsinnıñ tuğannarı häm alarnıñ yaqınnarı kerä dip isäplänä ide.
XS
SM
MD
LG