Accessibility links

җомга, 2 декабрь 2016, Казан вакыты 21:17

Rusiä räsmiläre Putinnı tänqitlägän kitapta ekstremizm ezli


Sişämbedä Mäskäwneñ Basman mäxkämäse ber kitapnı ekstremistik dip tanırğamı-yuqmı digän mäsälädä tıñlawlar başladı. Rusiädä İslamğa bağışlanğan kitaplarnıñ ekstremistik dip tıyıluı yañalıq tügel. Yañalıq şunda: bu yulı kitap İslamğa tügel, ä Putin säyäsäten tänqitläwgä bağışlanğan.

"Söymägän ilem" dip atalğan 140 bitlek bu kitapnı tanılğan säyäsi küzätüçese, üz fikerlären yış qına bezneñ radio aşa da citkerep torğan Yabloko partriäse äğzası Andrei Piantkovskiy yazğan. Kitap nigezdä anıñ Kremlgä tänqidi qaraş belän yazğan mäqälälärennän tuplanğan. Ekstremistik dip tabılğan oçraqta avtorğa irektän möxrüm itelü, Yabloko partiäsenä – saylawlardan çitlätelü yanıy.

Mäxkämä utırışında qatnaşqan xäbärçebez äytüençä, utırış barışında ğayepläwçe belän ğayeplänüçe taraflar arasında närsä ul ekstremizm digän mäsälädä qızu bäxäs qupqan. Pianktovskiy ber ara urınınan sikerep torıp, zinhar bu kitapta ekstremizm bulğan urınnarnı tabıp bıregez dip kitabın ğayepläwçelärgä atqan:

"Räxim itep bu kitaptağı qurqınıç urınnarnı kürsätsägez ide. Bezneñ närsädän saqlanırğa kirägen añlıysıbız kilä" dide Piantkovskiy.

Prokurorlar Piantkovskiynıñ bu täqdimen kire qaqqan. 5 säğät barğan utırış näticä birmägäç, anı kiçekterergä bulğannar.

Däwlät pedagogiä universitetınıñ Rusiä ädäbiatı kafedrası mödire Aleksandr Kudrinskiy utırışta çığış yasap, prokurorlarnıñ ğayepläwlären tögäl tügel häm butalçıq dip atadı:

"Kitapta nindider köç qullanuğa öndäwlär, nindider millätlärne kimsetülär bar digän ğayepläwlär.. Bu inde märxüm nindider zıyannan wafat bulğan digän näticä şikelle" di Aleksandr Kudrinskiy.

Axır çiktä xökemdar Svetlana Klimova kitapnı tağın ber qat tikşererü öçen bu yulı Yustitsiä ministrlığı belgeçlärenä birergä täqdim itkän.

Piantkovskiy häm anıñ advokatları bu räsmi belgeçlärgä ışanmıylar, şuña kürä Mäskäw universitetınıñ bäysez belgeçlärenä möräcäğät itkännär:

"Mäxkämä bez täqdim itkän belgeçlärne kire qaqtı, bu beraz borçıy, şulay da, bäysez törkem ğädel tikşerü başqarır dip ömetlänäm" di advokat Roman Karpinskiy.

Rusiädä yaqınlaşıp kilgän saylawlar aldınnan, berniçä ay elek ekstremizmğa qarşı yaña qanun qabul itelgän ide. Piantkovskiy eşe şuşı yaña qanun nigezendä tikşerelgän berençe eş. Küzätäçelär fikerençä, bu qanun oppozitsiädäge partiälärgä saylawlar waqıtında zur awırlıqlar tudıraçaq.

ali ğilmi
XS
SM
MD
LG