Accessibility links

якшәмбе, 11 декабрь 2016, Казан вакыты 13:12

Ukrainadağı parlament saylawlarında populizm berençe urınğa çığa


Ukraina saylawçıları bu yäkşämbe könne tağın yaña parlament saylıy. Bu soñğı 3 yılda inde dürtençe ilküläm saylawlar. Ämma bu waqıtınnan elek ütkärelüçe saylawlarda tawışlarnı sanap näticä yasağannan soñ da ildäge wäzğiät, köçlär çağıştırması ällä ni üzgärmäs kebek. Töp firqälärneñ xalıqqa birgän küp kenä zur wäğdäläre ütälmäskä oxşağan.

Ägär dä Ukrainada firqälärneñ saylawlar aldınnan birgän wäğdäläre ğämälgä aşarday ikän, saylawçılar kemgä genä tawış birmäsen xalıqnıñ tormışı barıber yaxşıraçaq dip kötärgä kiräk. Anda qatnaşuçı 20 firqä häm bloknıñ küpçelege bik zur wäğdälär birde. Häm parlamentqa kerer dip kötelgän töp firqälär barısı da ber ük närsäne diärlek wäğdä itä. Ul da bulsa xalıqqa kübräk aqça birü.

2004 yıldağı prezident häm bıltırğı parlament saylawlarınnan ayırmalı bularaq bıyıl saylaw aldı köräşendä NATOğa quşılu kebek tışqı säyäsät mäsäläläre, Rus telen ikençe däwlät tele itü kebek eçke problemalar kütärelmi diärlek.

Köndäşlär xäzer därräw sotsial-iqtisadıy mäsälälärgä totındı.

Iñ töp öç törkem, premyer ministr Viktor Yanukoviç citäklägän Regionnar Firqäse, prezident yaqlı Bezneñ Ukraina-Xalıq Saqlanuı häm Yuşçenkonıñ elekke berektäşe bulğan Yulio Timoşenko Blogı çığımnar mäsäläsendä 4 yünäleştä ber ük närsäne täqdim itä: Bala tabuçılarğa häm üsterüçelärgä tüläwlärne nıq arttıru, studentlarğa tüläwlär, stipendiälärne kütärü, awıl cirlärendä tormışnı yaxşırtu häm professional ğäslär buldıru öçen xärbi çığımnarnı arttıru.

Bolardan tış här firqä başqa törleräk arrtırular da wäğdä itä. Bezneñ Ukraina-Xalıq Saqlanuı mäsälän kiläse yılda xezmät xaqların 60 protsentqa arttıraçağın belderä.

Timoşenko Blogı Sovetlar Berlege tarqalğanda Ukraina xalqınıñ banklarda qalıp yanğan 20 milliard dollardan artıq aqçasın 2 yılda kire qaytarırğa wäğdä itä.

Regionnar firqäse 20 yıl däwlätkä eşlägän büdjet xezmätkärlärenä fatir biräçäkbez di.

Komunistlar isä pesniälärne urtaça xezmät xaqınıñ 70 protsentına qädär kütärergä teli.

Ämma iqtisad belgeçläre andıy çaralar öçen büdjetqa östämä berniçä distä milliard dollar aqça qayan kiler ikän dip aptıraşta qalğan häm bu saylaw aldı köräşe populist wäğdälärgä nigezlängän dip kisätä.

Azatlıq Radiosınıñ Ukraina belgeçe Yan Maksymiuk saylawçılar ällä ni ışanmasalar da tawış birüdä aktiv qatnaşaçaq di. Qantaşuçılar 70 protsenttan artır dip kötelä.

"Ğömümän alğanda Ukraina xalqı säyäsättän tuyğan dip uylıym. Alar bu saylar zur üzgäreş kiterer dip kötmi. Älbättä alar saylawlarğa baraçaq. Alar programmalar öçen tawış birmiäçäk, çönki alar programmalarğa ışanmıy. Alar Ukraina säyäsätendäge 3 xarizmatik keşe artında torğan säyäsi simvolizm öçen tawış biräçäk. Barı şul ğına" di Maksymiuk.

Fiker beleşülär dä saylawlar näticäsendä köçlär çağıştırmasınıñ bik üzgärmiäçägen kürsätä. Küpçelek fiker beleşülärgä qarağanda Yanukoviçnıñ Regionnar firqäse 30-40 protsent tawış cıyaçaq. Yılına 7 protsentlı iqtisadıy üseş premyer Yanukoviçnı totrıqlılıq garantiäse itep gäwdäländerä.

Timoşenko Blogı 20-30 protsent cıyar dip kötelä. Timoşenko saylawlarğa korrupsiägä qarşı köräş bayrağın yuğarı kütärep bara. Ul şulay uq ildäge zur iqtisadıy üzeş ğadi xalıqnıñ tormışında çağılmıy di.

Yuşçenko citäklägän Bezneñ Ukraina-Xalıq Saqlanuı Yuşçenkonıñ prezident bularaq näticäle eşli almawı säbäple küp kenä tarafdarların yuğaltqanğa oxşıy. Ul iñ kübendä 20 protsent cıyar dip kötelä.

Tağın 2 keçkenäräk firqä Komunistlar häm Sotsialistlar 3 protsentlı kirtäne ütep şulay uq parlamentqa kerergä mömkin.
XS
SM
MD
LG