Accessibility links

пәнҗешәмбе, 8 декабрь 2016, Казан вакыты 06:57

Tiflistä qulğa alınğan elekke ministrnı yaqlap miting ütte


Grüziä başqalası Tiflistä comğa könne oppozitsiä berniçä meñ keşene mitingqa cıydı. Alar atnakiçtä korrupsiägä bäyle ğäyepläwlär nigezendä qulğa alınğan elekke saqlanu ministrı Irakli Okruaşvilinı yaqlıy.

Tiflis üzägenä çıyılğan demonstratsiäçelärne prezident Mixail Saakaşvilinıñ yaqın tarafdarı, parlament äğzası Giga Bokeria ägär dä tärtipsezleklär çıqsa xakimiätlär bik qırıs räweştä köç qullanaçaq dip kisätte.

Baş prokuror urınbasarı Nika Gvaramia jurnalistlarğa tikşerüçelär qulında Okruaşviliğa qarşı yaña dälillär bar dip belderde. Okruaşvili Prezident Mixail Saakaşvili şäxsän üze säyäsi köndäşlären üterergä färman birgän dip beldergännän soñ 2 kön ütügä qulğa alındı.

Prokuror urınbasarı äytüençä, yaña dälillär şulay uq berniçä kön elek totqarlanğan elekke prezident süzçese Dimitri Kitoşvilidan alınğan.

"Bu xezmättäşlek näticäsendä şul açıqlandı. Irakli Okruaşvilinıñ ğämälläre oyışqan cinayätçel törkemneñ yanap alu ısulında tügel, yanaw aşa däwlät räsmieneñ zur külämdä rişwät aluı ısulında bulğan. Menä monda Kitoşvili birgän dälillär, räxim itep tanışığız. Minemçä bu dälillär älege mäsälädä bezneñ pozitsiäne mömkin qädär yaxşıraq añlata" dide Gvaramia.

Okruaşviliğa atnakiçtä belderelgän ğäyepläwlärneñ berse Kitoşvili eşe belän bäylänä. Kitoşvili kesä telefonı operatorınıñ 2.6 protsent öleşen yanaw aşa üzläşterüdä ğäyeplänä.

Baş prokuror urınbasarı äytüençä, şul soraw aludan soñ aqça qaldırıp toru aşa irekkä çığarılğan.

Okruaşviliğa qarata ğäyepläwlär turında isä

"Irakliy Okruaşvili Gruziäneñ cinayät qanunı nigezendä qurqıtıp aqça taläp itüdä, aqça yuuda, wazıyfasınnan yawızlarça faydalanuda, häm wazıyfasına wayımsız qarawda ğäyeplänä. Ul xäzer qulğa alınğan häm tieşle waqıtta aña ğäyepläwlär beldereläçäk. Annan soñ alğa taba çaralar kürü öçen bu eş mäxkamägä tapşırılaçaq. Prokuratura anı alğa taba da totqarlawnı sorıy. Tikşerü eşe däwam itä" dide Gvaramia.

Ämma oppozitsiä bu qulğa qalu tänqitläwçeneñ häm qurqınıçlı säyäsi köndäşneñ awızın tomalaw öçen eşlände di. Sişämbe könne Okruaşvili prezident Saakaşvilinı üzeneñ säyäsi köndäşlären üterergä färman birüdä häm ildä avtoritar xakimiät urnaştıruda ğäyeplägän ide.

"Kön sayın bulıp toruçı repressiälär, yortlarnı cimerülär, watandaşlarnı talawlar häm üterülär, üterülärgä ayıruça basım yasarğa telim, bolar xökümätebezneñ ğädäti eşenä äwerelde" dide Okruaşvili matbuğat oçraşuında.

Ämma ul bu ğäyepläwlärne raslawçı bernindi dälillär dä kitermäde.

Okruaşvili 2006 yılda Mäskäwne Gruziädän ayırılırğa teläwçe Könyaq Osetiä belän Abxaziäne yaqlawda ğäyeplägännän soñ Saakaşvili anı wazıyfasınnan alğan ide.

Bu atnada Okruaşvili Berdäm Gruziä öçen dip atalğan oppozitsion xäräkät oyıştırdı.

Comğa könne anı yaqlap mitingka cıyılğannar şulay uq xökümätneñ eşennän kitüen, waqıtınnan elek parlament häm prezident saylawları ütkärüne dä taläp itte. Miting xakimiät köçläre belän keçkenä qarşılıq bulıp alsa da, zur köç qullanusız tınıç qına ütte. Oppozitsiä berniçä könnän tağın xalıqnı cıyaçağın belderde.

Naif Aqmal
XS
SM
MD
LG