Accessibility links

дүшәмбе, 5 декабрь 2016, Казан вакыты 11:44

Ukrainada parlament saylawları uzdı


Ukrainada parlament saylawlarında birelgän tawışlarnı sanaw tämamlanıp kilä. Soñğı bulıp mäğlümatlär ilneñ könçığışınnan kilä. Mäğlüm bulğança anda küpçelek xalıq premyer-ministr Viktor Yanukoviç citäkçelegendäge Regionnar partiäsen yaqlıy. Başta ciñüne Yulia Tymoşenko blogı iğlan itkän ide.

Bügen köne buyı sannar üzgärep tordı, tapşıruıbız tämamlanğanda köçlär çağıştırması tağın üzgärergä mömkin. Ber genä äyber tögäl bilgele, saylawlar uzdı, tawış birüdä xalıqnıñ 60%tan artığı qatnaştı. Üzäk Saylaw Komissiäse räise Volodymyr Şapoval saylawlarnı irekle häm ğadel dip bäyäläde:

"Ğömümän alğandam ukrainnarnı qotlap bula, saylawlar uzdı. Minem fikeremçä, tawış birü qanun qısalarında häm demokratik şartlarda uzdı. Tawış birü tieşençä küzätelde."

Bu saylawlarda Yulia Tymoşenkonıñ säyäsi blogı uzğan tawış birügä qarağanda yaxşıraq näticägä ireşte:

"Bu parlament saylawlarında yañadan Ukrainanıñ demokratik köçläre ciñde, bergä bez köndäşlärdän kübräk tawış aldıq. Bik bik yaxşı, min prezident häm bezneñ demokratik köçlär törkemen qotlarğa telim."

Kön azağına taba könçığış Ukrainadan saylaw näticäläre cıyıla başlağaç, premyer Viktor Yanukoviçnıñ Regionnar firqase alğa çığa başladı. Ul da üz partiäsen ciñüçe dip iğlan itte:

"Bez bu saylawlarda ciñüçelär, min bez yaxşı näticälärgä ireştek dip ışanam, häm bezneñ koalisiä tözergä xaqıbız bar, dip sanıym."

Koalisiä turında söyläşülär bulmas dip farazlana. Qayber matbuğat çaralarında Ukrainada saylaw urınnarındağı qayber citeçsezlär turında mäqälälär dönya kürde. Misal öçen, könçığış Ukrainada küzätüçelär 800gä yaqın ülgän keşeneñ saylawlarda tawış birgän buluın açıqlağan, dip yaza Daily Telegraph basması. Şulay uq ber ük isem-familiägä yazılğan saylaw qağäzläre tabılğan. İkençe yaqtan, bu saylawlar elekkeläre belän çağıştırğanda küpkä irekleräk häm ğadelräk şartlarda uzdı, dip yaza İndependent gazetı. Eye, Äflisün inqilabı dip äsärlänü kimi töşte. Qızğanıçqa qarşı iqtisadnıñ xäle 2004nçı yıldan birle ällä ni üzgärmäde. Ämma saylawlar aldınnan prezident belän parlament arasındağı nizaqnıñ – xärbi köç yardämendä tügel, ä konstitusiä nigezendä çişelgänen istä totsaq, ulrainnar tawışların demokratiä üsä barğan ildä birde, dip yaza İndependent basması jurnalistı.
XS
SM
MD
LG