Accessibility links

шимбә, 10 декабрь 2016, Казан вакыты 11:45

Kasparov prezidentlıqqa namzät itep saylandı


Yäkşämbedä oppozitsiädäge "Başqa Rusiä" koalitsiäse elekke dönya çempionı Garry Kasparovnı kiläse yılda ütäçäk prezident saylawlarına berdäm namzät itep sayladı. Kasparov, üzeneñ prezident bulu ixtimalınıñ zur bulmawın añlasa da, Rusiädä çın oppozitsiä buluın kürsätergä teläwen belderde.

Şulay itep, liberallardan alıp sulçılarğa qädär, oppozitsiädäge törle köçlärne üz eçenä alğan "Başqa Rusiä" koalitsiäsen kiläse yıl prezident saylawlarında kem wäkilllek iter digän, berniçä ay barğan bäxäslär artta qaldı.

Yäkşämbedä Mäskäwdä ütkän qorıltayda 494 delegatnıñ 379-ı berdäm namzät itep şaxmat ostası, elekke dönya çempionı Garry Kasparovnı sayladı. Tawış birüdän soñ Kasparov bolay dide:

"Bu yulnıñ awır bulaçağın beläm. Bu uram cıyınnarı ütkärü genä tügel, ä söyläşülär, urtaq fiker ezläw. Şaxmat uynap, törle illärdä yörep tuplağan belemem, täcribäm citär häm sezneñ yärdämegez belän bu awırlıqlarnı ciñermen dip ömetlänäm" dide Garri Kasparov.

Awırlıqlarnı ciñgän oçraqta da, Kasparovnıñ kiläse saylawlarnı ciñep çığa aluı ikele. Rusiädäge bügenge şartlarda Putin kemgä törtep kürsätsä, şunıñ waris bulaçağı, şik tudırmıy şikelle. Älbättä, monı Kasparov ta añlıy, alaysa närsä teli, digän sorawğa, bäysez säyäsi mäğlümät üzäge citäkçese Aleksei Muxin:

"Minemçä, Kasparov ğäyre räsmi oppozitsiäneñ buluın kürsätergä teli. Läkin anıñ citäkçelekkä yoğıntısı barmı – bu soraw. Kasparov aqıllı keşe bularaq bügenge Rusiädä oppozitsiäneñ modada tügel ikänen añlıy" dide säyäsät belgeçe.

Aleksei Muxin süzlärençä, Kasparovnıñ elekke premier-ministr Mixail Kasyanov belän urtaq tel taba almawı da anıñ uñışqa ireşü ixtimalın şaqtıy kimetä.

Ä menä Mäskäwdäge Heritage Foundation mödire Yevgeni Volk fikerençä, kiläse prezident saylawları näticäläre turında özderepäytergä äle irtä:

"Älbättä, oppozitsiä arasında da yarış bara, äle komunistlar kebek "räsmi" oppozitsiä dä bar. Läkin saylawlarğa qädär tağın 5 ay bar, äle küp närsä üzgärä ala" dide Yevgeni Volk.

Räsmi terkälmägän xäräkät bularaq, "Başqa Rusiä" dikäber ayında ütçäk parlament saylawlarında qatnaşa qalmıy. Şuña da qaramastan, xäräkät citäkçeläreneñ berse, natsional-bolşeviklar partiäse başlığı Eduard Limonov tulı külämle kampaniä alıp barırğa çaqırdı. Qorıltayda xäräkätneñ namzätlär isemlege raslandı. Berençe 3 urınğa: Kasparov, Limonov häm üzäk banknıñ elekke räise Viktor Geraçenko saylandı.

ali ğilmi
XS
SM
MD
LG