Accessibility links

җомга, 9 декабрь 2016, Казан вакыты 16:44

Oppozisiä: Putin ber kemne dä şaqqatırmadı


Rusiä prezidentı Vladimir Putin, dikaberdä Duma saylawlarında Berdäm Rusiä partiäsennän namzätlär isemlegen citäkliäçägen belderde. Berdäm Rusiä qorıltayında Putinnıñ kötelmägändä äytkän ikençe süze – premyer-ministr bulu niäte turında ide. Säyäsi küzätüçelär Berdäm Rusiä bu saylawlarda tawışlarnıñ 70%tınnan artığın yawlıy ala, dip farazlıy. Premyer-ministr bulsa, Putin prezidentlıq möddäte tämamlanğaç ta xakimiättä qalaçaq, digän süz. Rusiädä oppozisiädäge firqalär citäkçeläre Putinnıñ bu belderüenä nindi qaraşta tora?

Nikita Belych

2005neñ may ayınnan birle Uñ Köçlär Berlegeneñ säyäsi şurasın citäkli. Rusiäneñ Uñ Köçläre watandaşlar cämğiäte häm keşe xoquqların yaqlawnı alğa sörä. Üzlären alar Putin Kremlendäge säyäsätkä oppozisiädä dip sanıy, ämma firqa eşçänlegenä Kremldäge Anatoliy Çubays yoğıntısı zur. Putinnıñ Berdäm Rusiä qorıltayında yasağan belderüenä qadär, Levada üzägendä cıyılğan fikerlärgä kürä, Uñ Köçlär Berlegeneñ tawışlarnıñ 2%tın alu ixtimalı bar ide.

"Putinnıñ qararı bezneñ saylawçılarğa täsir itmäyäçäk. Prezident döres adım yasadı. Añarçı ul Berdäm Rusiä yulbaşçısı bularaq parlament saylawları waqıtında annan çitläşä kebek kürenä ide. Xäzer saylawlar aldınnan ul çın wazifasın başqaraçaq."

Garry Kasparov

2005nçe yıldan birle Berläşkän Watandaşlar Frontın citäkli. Sintäberdä Başqa Rusiä berdämlege anı üzeneñ prezidentlıqqa namzäte itep sayladı. Watandaşlar Frontındağı köçlärbe prezidentqa qarşı bulu berläşterä. Alar räsmi terkälmägän, şuña kürä 2nçe dikaber Duma saylawlarında qatnaşa almayaçaq:

"Eşneñ näticäse törleçä bulırğa mömkin, ämma ber äyber añlaşıla, Putin qalırğa häm wazğiätne üz kontrolendä totırğa qarar itkän. Ul säyäsi bäxästä ber tarafnı aldı, elekke prezident Yeltsin alay itmägän ide. Yeltsin üzen böten Rusiälelär atası itep quydı, ul säyäsi prosesslarda turıdan turı qatnaşmadı. Putin tuıp kilgäç eçtälekkä xäzer forma birergä tırışa, monı bez elekke GDR, könçığış Germaniädä bulğan ber firqalek yomşaq diktatorlıq dip äytä alabız."

Grigory Yavlinsky

1995nçe yıldan birle Yabloko firqasen citäkli. Almaçılar äwzem eşçänlek alıp bara, alarnıñ maqsatları – keşe xoquqları, watandaşlar cämğiäte, qanun xakimiäte. Açıqtan açıq Yabloko Yeltsin häm Putin xakimiätlären täñqitläp kilde. Levada üzäge mäğlümatlärenä qarağanda, Putinnıñ belderüenä qadär Yabloko partiäse öçen xalıqnıñ 2%tı tawış biräse bulğan.

"Putin qararına min alay uq borçılmıym. Ä menä anıñ nindi şartlarda qabul itelüe – borçılu uyata. Stalin ısulında – mäñge qalu, räxmät uqular häm qupşı süzlär, menä bu wazğiätne tudıru borçılu uyata, ä bolay da här keşegä bilgele bulğan äyberlärne añlatu tügel."

Vladimir Jirinovsky

Rusiäneñ Liberal Demokratlar firqasen anıñ oyışuınnan, 1989nçı yıldan birle citäkli. Liberal-demokratlar köçle üzäk xökümät häm rus milläteneñ mänfäğätlären alğa sörä. Räsmi töstä alar oppozisiädä dip sanalsa da, Yeltsin çorında da, xäzer dä alar Kreml belän bergä. Levada üzäge LDPR 11% tawış cıyar dip farazlıy.

"Nixäyät Berdäm Rusiä üzeneñ 45%tın ala alır, Putinsız alar 25%nı ğına alır ide. Xäzer alar yartısına yaqının cıya alalar. İkençe yartısı oppozisiädäge Liberal-demokratlar häm kommunistlarğa bulaçaq. Ğadel Rusiä ber ni dä almasqa mömkin, çönki alar xakimiättäge ikençe partiägä äylänä almadı."
XS
SM
MD
LG