Accessibility links

сишәмбе, 6 декабрь 2016, Казан вакыты 22:49

Kördlär belän bäyle terrorçılıq qabat Törkiäneñ kön tärtibendä


Niçä un yıllardan birle däwam itkän Kördlär belän bäyle terrorizm qabat Törkiäneñ kön tärtibendä. Ütkän atna azağında Törkiäneñ könyaq könçığışında Kördlär yäşägän Şırnak şähäreneñ awıllarınıñ berendä terroristik xökem arqılı 12 sivil üterelde. Alar awız açu waqıtında minibus belän awıllarına qaytqanda PKK partizannarınıñ xökemgä duçar bulğannar. Gazetalar miniaftobus eçendägelärneñ ber öleşe saqçı ide dip yazsa da, avtobusta ber genä mıltıq tabılğan. Qısqası soñğı waqıtlarda PKK yä yullarğa minalar tözep, yä isä xärbi tözeleşlärgä qorallı xökem yasap ğäskärlärne üterü metodın qullana ide. Inde niçä yıllardan soñ berençe märtäbä sivilar şul xätle küp sanda üterelä. Säyer toyılsa da Körd partizan oyışması PKK üz Kördlären üterde.



Bu waqiğa säyäsi häm xärbi platformalarda diskussiälärneñ başlawına da yul açtı. Generlaştab başlığı armiä generalı Yaşar Büyükanıt, Xärbi Akademiädä uqu yılı başlanu uñayı belän yasağan çığışında, ”Terror oyışmasına terrorist dip äytälmägän, terror oyışması azğaların “qärdäşlärbez “dip atağan, Törek Qorallı Köçlärenä “separatist” digän isem quşqan ber qaraş belän qarşı qarşığa qaldıq” dip belderde. Büyükanıt şuşı süzläre belän Kördlärneñ Demoktarik Cämğiät Partiäseneñ (DCP) parlamentağı ağzası Sabahat Tuncelneñ “ Bezgä balalarığıznı terrorist dip iğlan itegez, sezne ul çaqta alardan ayırım dip qabul itiyek didelär. Mondıy ber täqdimne hiç ber Körd qabul itmäs” digän belderüwenä işarä itte.

Bu atnada 2-nçe Uktäberdä isä İzmirneñ Buca isemle rayonında 3,5 säğät ara belän ike bomba şartladı. Ber keşe ülde, ul mesken dä yaña ğına xärbi xezmäten tämamlap kire qaytqan ber yäş ide. 11 keşe dä törle däräcädä cäräxätlände, qayberäwlärneñ qulları yaki ayaqları quptı.

Tege yaqtan şuluq könne DCP-neñ liderı Ahmet Türk parlamentta jurnalistlarğa Generalştab başlığı Büyükanıttın üzlären tänqitlägän qatı süzlärenä çawap qaytarıp, “İmralı utrawında törmädä totılğan PKK citäkçese (Abdullah Öcalan) törle mädäniätlär häm ayırmalıqlar ber baylıq bularaq qabul itelsä, bolar qanuni garantiä astına alınsa, ike ay eçendä PKK-nı qoralların taşlarğa kündererbez” digän ide. Premiär Erdoğan da şul uq ruxta söyli. Läkin nigä qan ağızıluına qarap qına tora” dip belderde.

Oppozitsiädäge Millätçe Xäräkät Partiäse liderı Däwlät Bahçäli dä “xökümätne Amerikan dusların açulandırmas öçen ğäskärlärneñ şähit buluına, küpläp üterülärgä küz yoma, parlamenttağı DCP dä PPK-nıñ süzçelegen yasıy” digän qatı eçtäleqle tänqitlär yasadı. Bahçäli şuşı çığışında ayıruça Törek parlamentı Törek Qorallı Köçlärenä cik aşa xärbi operatsiä yasaw öçen xoquq birsen digän taläpne dä kütärde.



Mäğlüm PKK xärbi bazlarınıñ küpçelege Tönyaq Ğiraqta tora, läkin AQŞ-nıñ basımı säbäple TQK çikne ütep şuşı bazalarnı yuqqa çığarılmıy. Bu turıda häm Washington häm dä Bagdat belän kileşmäwçänlek xökem sörä. Premier Erdoğan bu atnada AQŞ-ta bulğan çaqta PKK partizannarınıñ qullarında AQŞ qoralları, xätta tanklar da bar” dip şikäyät beldersä dä, AQŞ tışqı eşlär ministerlıgı bu döres tügel dip şuşı däğväne kire qaqqan ide. Törkiädä Amerikannar bez PKK-qa qarşı dilär, läkin alarnı astırtın räweştä yaqlıylar digän faraz bik köçle.

İnde bu partizan suğışın dialog aşa çişep bula mı digän mäs’älä älegä kön tärtibenä mengäne yuq. Kiresençä ğäyepsez sivilär häm xärbi wazıyfasın ütägändä şähit töşkän yäş soldatlarnıñ sanı artqan sayın PKK-ğa näfrät üsä häm dialog öçen bik ömet kürenmi.

Äxtäm İbrahim, İstanbul

XS
SM
MD
LG