Accessibility links

җомга, 2 декабрь 2016, Казан вакыты 21:15

Putin belän Sarkozy urtaq tel taba alırmı?


Sişämbedä Mäskäwgä Fransiä prezidentı Nicolas Sarkozy kilde. Berniçä kön elek kenä ul Kremlne dönya problemnarın qatlawlandıruda, neft häm gaznı Yewropağa üz qaraşın tağu öçen qullanuda ğayeplägän ide. Şuşı aldan yasalğan "qatı belderülär" Sarkozyğa anıñ Rusiä prezidentı Vladimir Putin belän söyläşülärendä awırlıqlar tudıra alamı?

Fransiä prezidentı bulıp 5 ay çaması ğına eşläsä dä, Nicolas Sarkozy Rusiä xökümäte isemenä şaqtıy küp tänqit äytep ölgerde. Rusiädäge keşe xoquqları torışın tänqitläw diseñme, Rusiä räsmilären dönya problemnarın qatlawlandıruda, Yewropağa üz qaraşın tağu öçen neft häm gaznı qoral itep qullanuda diseñme. İkeneçe yaqtan, Putin da, kiräk çağında süzgä aptırap torğannardan tügel. Şundıy ike citäkçe ber östäl artına utırıp nindi näticägä ireşä ala?

"Minemçä, bu säfärdän citdi näticä kötep bulmıy. Çönki soñğı waqıtta Fransiä belän Rusiäneñ qaraşları şaqtıy yırağaydı" di Mäskäwdäge xalıqara humanitar häm säyäsi tikşerenülär institutı citäkçese Vyaçeslav İgurnov.

Rusiä prezidentınıñ Mäskäw çitendäge utırmasında kiçke aş mäclese waqıtında İran mäsäläse dä kütärelergä mömkin. Rossiyskaya gazeta basmasınıñ sişämbe sanında dönya kürgän äñgämäsendä Sarkozy Tährannı aqılğa utırtu öçen qırısraq çikläwlär kertergä öndi. Mäğlüm bulğança, Mäskäw Tähranğa çikläwlär kertügä qarşı çığa.

Mäskäw belän Parijnı ayırğan tağın ber mäsälä bar – Kosovo. Fransiä bu töbäkkä bäysezlek birü yağında, Mäskäw – ayaq teräp qarşı.

Qıyulığı citsä Sarkozy Putin aldında Rusiädä keşe xoquqları, matbuğat ireklege torışın, oppozitsiä wäkilläreneñ totqarlanu xällären telgä alıp qarıy ala. Monnan tış, Kremlneñ gaz torbasın säyäsi qoral itep qullanu ğayepläwen qabatlıy ala. Döres, qayber belgeçlär fikerençä, monısı qatlawlıraq mäsälä:

"Minemçä, bu kommersiä genä tügel ä säyäsi mäsälä. Yewropa üze dä bazarların yabırğa tırışa. Rusiä genä tügel, ä ğäräp illäreneñ dä, bigräk tä däwlät qaramağındağı kompaniälären üz bazarına kertmäskä tırışa" di Vladimir Gutnik, Rusiä fännär akademiäseneñ Yewropanı tikşerü üzäge citäkçese.

Şulay da, belgeçlär fikerençä, qayber qarşılıqlarğa qaramastan, bu ike citäkçe urtaq fikergä dä kilergä mömkin:

"İkese dä pragmarik, üz illärendä wazğiätne yaxşığa üzgättergä tırışqan citdi säyästçelär. Sarkozynıñ Amerika yaqlı belderülärenä qaramastan, Rusiä belän Fransiä arasında citdi qarşılıqlar bulmayaçaq" di Global iqtisad häm xalıqara mönäsäbätlär institutı belgeçe Kira Zueva.

İke il arasında säwdä üseş kiçerä. Fransiäneñ energiä şirkäte Gazprom belän bergäläp Rusiäneñ ber ere yatmasın eşkärtä başlıy. Nixayät, aviatsiä, ğäläm öyränü ölkäsendä xezmättäşlek mäsäläsen kütärep bula. Yağni, urtaq tel tabu öçen dä citärlek forsat bar.
XS
SM
MD
LG