Accessibility links

пәнҗешәмбе, 8 декабрь 2016, Казан вакыты 21:15

Rice häm Gates Mäskäwdä Rusiä räsmiläre belän kileşä almadı


Quşma Ştatlarnıñ däwlät sekretare Condoleezza Rice häm saqlanu ministrı Robert Gates comğa könne Mäskäwdä Rusiä räsmiläre belän Yewropada raketa qalqanı urnaştıru planı turında söyläşülär ütkärde. Söyläşülärdän soñ Rusiäneñ tışqı eşlär ministrı Sergei Lavrov taraflar kileşügä ireşä almadı dip belderde.

Mäskäwgä kilgän amerikan räsmiläreneñ töp maqsatı Yewropada urnaştırılaçaq raketa qalqanınıñ Rusiägä yanamağanın añlatu ide. Çexiädä quyılaçaq radarnı häm Polşada urnaştırılaçaq berniçä raketanı räsmi Waşington İran häm Tönyaq Korea kebek illärneñ ixtimal höcümnärenä qarşı dip belderä. Mäskäw moña ışanmıy häm bu qalqannı üzenä qarşı dip qabul itä.

"Üzäk Yewropada urnaştırılası raketa qalqanı Rusiägä qarşı tügel. Rusiäneñ strategik qüätenä anıñ yoğıntısı bulmayaçaq. Bez Rusiä belän açıq häm tulı xezmättäşlek öçen. Bez Rusiä yağına törle täqdimnär yasadıq" dide Pentagon başlığı Robert Gates.

Küräseñ, amerikan räsmiläre Rusiä yağın bu yulı da ışandıra almağan. Rusiäneñ tışqı eşlär ministrı Sergei Lavrov säyläşülärdän soñ bolay dide:

"Amerikan räsmiläre bu 3nçe rayon Rusiägä qarşı tügel, dip ışandıra. Läkin Gates äfände üze dä, küpmeder yanaw buluın tanıdı. Älbättä bez moña qarşı çaralar kürergä tieş. Gärçä monı telämäsäk tä. Bezneñçä, iñ möxime – dönyadağı çın yanawlarnı açıqlaw" dide Rusiä ministrı.

Amerikan häm Rusiä belgeçläreneñ xezmättäşlege näticäle bulsın öçen, Lavrov Yewropada qalqan tözü planın tuñdırıp torırğa täqdim itte.

Rusiä prezidentı Vladimir Putin Quşma Ştatlarğa Yewroada yaña radar tözegänçe Äzärbaycandağı Ğabala radarın bergäläp qullanırğa täqdim itkän ide. Ämmä amerikan belgeçläre, sovet çorında tözelgän bu qorılmanı amerikan sistemasına yaraqlaştırıp bulmıy dip belderä.

Mäskäwdä ütkän "2x2" söyläşülärendä İrannıñ atom programması dä tikşerelde. Bu mäsälädä dä taraflar ber-bersemneñ eşçänlege belän qänäğät tügel.

"İranğa çikläwlär kertü maqsatı belän beryaqlı adımnar yasalmasa, bezneñ urtaq eşebez küpkä näticäleräk bulır ide. İranğa qarşı köç qullanu öndäwlären inde äytep tä torası yuq. Mondıy beryaqlı adımnar urtaq eşebezne yuqqa çığara" dide Rusiä ministrı.

Quşma Ştatlar däwlät sekretare Condoleezza Rice bez İrannıñ qoral yasaw niätenä yul quymayaçaqbız, häm Amerika qanunnarı nigezendä, monıñ öçen qulanılğan xisaplarğa, andıy keçelärgä çikläwlär kertäçäkbez dide.

Rice xanım şulay uq Rusiägä kilgän sayın keşe xoquqları mäsälsäen kütärüen häm bu yulı da sibil cämğiät wäkilläre belän oçraşıağa cıyınuın äytte.

ali ğilmi
XS
SM
MD
LG