Accessibility links

сишәмбе, 6 декабрь 2016, Казан вакыты 06:04

Ukrainada qabat "äflisun" xökümäte tözelä. Ütkännän sabaq alınğanmı?


Ukrainanıñ Könbatış taraflı partiäläre düşämbedä yaña xökümät tözergä kileşte. Uzğan ay ütkän parlament saylawlarında prezident Viktor Yuçenko häm elekke premier Yuliä Timoşenko blokları, bergäläp, tawışlarnıñ küpçelegen cıyğan ide. Şulay itep, Äflisun inqilabın oyıştıruçılar yänä berläşä. Bu yulı ozaqqamı?

Düşämbedä Ukrainanıñ saylaw komissiäse 30 sentäber ütkän saylawlarnıñ räsmi näticälären iğlan itte. Premier Yanukoviç partiäse, kommunistlar belän bergä Yuğarı Radada 202 urın alsa, Yuçenko belän Timoşenko blokları ikesenä bergä 228 urın. 450 urınlı parlamentta, bu, zur bulmasa da, küpçelek digän süz. Yaña koalitsiä turındağı quanıçlı xäbärne berençe bulıp Timoşenko üze citkerde.

"Parlament yaña, xakimiät yaña, demokratik taqımınıñ bar tarmaqlarda üzgäreşlär başqaru öçen bar mömkinlege bar" dide Yuliä Timoşenko.

Tanış süzlär. 3 yıl elek äflisun inqilabınnan soñ mondıy belderülär ber yasalğan ide inde. 9 ay da ütmäde äflisun taqımı tarqaldı. Prezident Yuçenko Timoşenkonı premier urınınnan aldı. Anıñ urınına prezidentnıñ köndäşe Yanukoviç kilde.

Xäzer Timoşenko yänä premyer bulırğa cıyına. Associated Prees agentlığına ul, bez ütkännän sabaq aldıq, xatalar qabatlanmayaçaq dide. Dimäk, kolaitsiä bu yulı ozınraq ğömerle bulaçaqmı? Belgeçlär äymeşli, "ay-hay":

"Yuçenko häm Timoşenkonıñ mänfäğätläre bik nıq ayırıla. Häm bu kiläse prezident saylawları belän bäyle. Ber yıl eçendä bik citdi saylaw aldı kampaniäse başlana. Yuçenko bu saylawlarnı barı tik ikençe turğa Yanukoviç belän çıqsa ğına ciñä ala. Ägär saylawlarğa Timoşenko da çığa ikän, Yuçenko ikençe turğa çığa almayaçaq, bu kön kebek açıq. Yuçenko belän Timoşenko arasında ozın ğömerle koalitsiä bula almawnıñ bu töp säbäbe" di Ukraina säyäsäte belgeçe İvan Lozovoy.

Tağın ber säbäp, 228 urın – ul bik çeterekle küpçelek, kiräk bulğan 50 protsenttan ni barı 2 urınğa artıq. Berniçä deputat salqın tiep awırdı isä, küpçelek yuq digän süz.

Bu wazğiättä öçençe köç – elekke spiker Vladimir Litvin blogı tawışları yärdäm itä alır ide. Anıñ Radada 20 urını bar. Tik anı üz yaqqa awdaru tırışlıqları älegä näticä birmäde.

Östäwenä, Yuçenko bloğınıñ üzendä dä berdämlek yuq. Äytik, elekke premier YuriYexanurov kebek deputatlar Timoşenkonıñ premier buluına qarşı.

Qısqası, belgeçlär fikerençä, ägär parlament Timoşenkonı premier itep raslıy almasa, äflisun koalitsiäse inde berniçä atnadan uq tarqalırğa mömkin.

ali ğilmi
XS
SM
MD
LG